Չնայած հայտարարված պարետային ժամին` Կահիրեի կենտրոնում շարունակվում է բազմամամրդ բողոքի ցույցը: Twitter-ում հայտված տեղեկությունների համաձայն` այս պահին երկրի կենտրոնական «Թահրիր» հրապարակում և հարակից շրջաններում հավաքվել է ավելի քան 150,000 մարդ: Ցուցարարներին են միացել նույնիսկ դատավորները և հոգևորականները: Այս մասին հաղորդագրություններ հայտնվել էին դեռ այսօր օրվա ընթացքում:
Al-Jazeera հեռուստաընկերությունը հենց նոր կադրեր ցուցադրեց, որտեղ երևում է,որ հանրահավաքի մասնակիցների հետ նույն հրապարակում է գտնվում ընդդիմության առաջնորդներից Մուհամադ Ալ-Բարադեին, որը քիչ առաջ բարձրախոսով ելույթ էր ունենում:
Ավելի վաղ Ալ-Բարադեին հայտարարել է, որ միայն Մուբարաքի հրաժարականը կօգնի դադարեցնել բախումները երկրում: Նա նշել էր, որ «Մուբարաքը պետք է հասկանա, որ նրա ժամանակը եկել է, և նա պետք է թողնի իշխանությունը խաղաղ ճանապարհով: Դրանից հետո մենք պետք է ստեղծենք անցումային կառավարություն, կոալիցիա, որը կներկայացնի ողջ հասարակության շահերը: Գործադիր այս մարմինը կբարեփոխի Սահմանադրության այն կետերը, որոնք ժխտում են ժողովրդավարոթյունը»,ա սել է նա: Ըստ Ալ-Բարադեի, երկրում դրանից հետո կանցկացվեն խորհրդարանի և նախագահի ընտրություններ:
Հիշեցնենք, որ Նոբելյան մրցանակակիր, ՄԱԳԱՏԵ-ի նախկին ղեկավար Մուհամադ Ալ-Բարադեին ժողովրդական ելույթների նախօրեին վերադարձել է երկիր` գլխավորելու ընդդիմությունը: Մի քանի օր Ալ-Բարադեին գտնվում էր տնային կալանքի տակ: