Սամբոյի միջազգային ֆեդերացիան առաջիկա դեկտեմբերին ժամանակավոր անդամության հայտ կներկայացնի միջազգային օլիմպիական կոմիտե:
Ֆեդերացիայի նախագահ Վասիլի Շեստակովն, ITAR-TASS-ի վկայությամբ , այս մասին հայտարարել է մամլո ասուլիսում: Նա նաև ասել է, որ սամբոն աշխարհում բուռն զարգացում է ապրում: Մարզաձևը ներկայացվել է մարզական լրագրողների միջազգային միությունում: Սամբոյի հմայքն առաջիկայում կցուցադրվի նաև Ասիայի և Եվրոպայի օլիմպիական կոմիտեներում: Հնարավոր է ցուցադրական մրցաշար տեղի ունենա նաև Սոչիի ձմեռային օլիմպիական խաղերում:
Մոնղոլիայի սամբոյի առաջնությունում այս տարի հայտավորվել է 400 մասնակից, իսկ Ճապոնիայի ուսանողական խաղերում ձյուդոիստների կատարմամբ մարզասերներին է ներկայացվել սամբոյի ամբողջ հմայքն ու գեղեցկությունը :
Մարզաձևի միջազգային ֆեդերացիան ենթադրում է, որ երկամյա քննարկումներից հետո ՄՕԿ-ի անդամ մարզաձևերի շարքում տեղ կունենա նաև սամբոն :
Հուսանք, որ ռուսական այս մարզաձևը, որը թարգմանաբար նշանակում է` «ինքնապաշտպանություն առանց զենքի», կդառնա օլիմպիական ընտանիքի անդամ: Այս դեպքում հայ օլիմպիականների շարքն, անշուշտ, կխտանա, հաջողությունները` նույնպես: Չէ՞ որ Հայաստանի սամբիստները տասնյակ հաղթանակներ են տարել աշխարհի, Եվրոպայի առաջնություններում, միջազգային մրցաշարերում :
Մեր սամբիստներից առաջինը 1981 թ.աշխարհի չեմպիոնի պատվին արժանացել է ԽՍՀՄ վաստակավոր մարզիչ Լևոն Հայրապետյանի աշակերտ, երևանցի Գառնիկ Հովհաննիսյանը` Մադրիդում: