Քանի որ փետրվարի 19-ը դարձել է խորհրդանշական օր, և թե՛ 2003 թ., թե՛ 2008 թ. այդ օրն են կեղծվել ՀՀ նախագահի ընտրությունները, Հայ ազգային կոնգրեսը որոշել է նախորդող օրը` փետրվարի 18-ին, անցկացնել հանրահավաք:
Ի՞նչ ակնկալիքներ ունի Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանը ՀԱԿ-ի` առաջիկա հանրահավաքից: «Ստեղծվել է քաղաքական նոր իրավիճակ, քանի որ Տիգրան Կարապետյանը մուտք է գործել ընդդիմության դաշտ, հանրահավաքներ է անցկացնում, արդարության խնդիրն է արծարծում: Շատ կարևոր է, թե ՀԱԿ-ը հանրահավաք անելով ի՞նչ նոր հարցեր, ի՞նչ խնդիրներ է արծարծելու: Տեղյակ եմ, որ ուզում են հանրահավաքն անցկացնել Ազատության հրապարակում: Չգիտեմ` կկարողանա՞ն մուտք գործել Ազատության հրապարակ, թե՞ ոչ: Ժամանակը ցույց կտա»,- ասաց մեր զրուցակիցը:
