Վերջին տարիներին ավելի հաճախակի են դարձել ավտովթարի հետևանքով զինվորականների տուժելու դեպքերը: Մահվան ելքով մի դժբախտ դեպք էլ անցյալ տարի էր կատարվել:
Տարվա զինպատրաստության պլանի համաձայն, Արմավիրի մարզում գտնվող երկու զորամասերի հրետանային ստորաբաժանումները 2011թ. սեպտեմբերի 23-ից հոկտեմբերի 8-ը պետք է ճամբարային հավաք անցկացնեին «Բաղրամյան» ուսումնական կենտրոնում: Եվ քանի որ վրանները քուն հրամանից մեկ ժամ առաջ պետք է տաքացվեին, զորամասի հրամանատարությունը՝ կորպուսի հրամանատարի թույլտվությամբ, մի խումբ զինվորների՝ կրակային դասակի հրամանատար, մարտկոցի ավագ սպա, ավագ լեյտենանտ Համլետ Վիրաբյանի ղեկավարությամբ, «Սադկո» մակնիշի, մարտական խմբի մեքենայով ուղարկում է հարևան զորամասերից մեկը՝ վառելափայտ բերելու: Եվ հոկտեմբերի 3-ին, ժամը 17.30-ի սահմաններում Համլետ Վիրաբյանը, նույն զորամասի վարորդ, շարքային Արման Կ. Փահլևանյանը, վառելափայտ բարձողներ` կոչումով ավագ Հայկ Ա. Դավթյանը և շարքայիններ Շիրազ Տ. Հայրապետյանը, Նիկոլայ Ռ. Սարգսյանը, Գևորգ Ռ. Սարուխանյանը, Գրիգոր Ռ. Կարապետյանը, Մենուա Ա. Մարտիրոսյանը «Սադկո» ավտոմեքենայով դուրս են գալիս վրանային ավանից՝ վառելափայտ բերելու: Այնտեղից դուրս գալուց հետո, երբ մեքենան մոտ 100 մետր հեռանում է ավանից, Համլետը չարաշահելով իր` որպես ավտոմեքենայի ավագի և վարորդ Արման Փահլևանյանի նկատմամբ պետի դիրքը, Արմանին հրահանգում է՝ իրեն հանձնել մեքենայի ղեկը, որովհետև ուզում է քշել:
Փահլևանյանը կատարում է պետի բանավոր հրամանը, և Համլետ Վիրաբյանն է շարունակում մեքենան վարել 30-40 կմ/ժ արագությամբ՝ չունենալով մեքենա վարելու իրավունք և բավարար փորձ: Վիրաբյանը 30-40 կմ/ժ արագությամբ երթևեկելիս, պատշաճ կերպով ձախ շրջադարձ չկատարելու հետևանքով, դուրս է գալիս գլխավոր ճանապարհից, մի քանի մետր անցնում է հողածածկ բլուրների վրայով, այնուհետև բախվում մեկ այլ հողածածկ բլրակի և կանգ առնում: Վթարի հետևանքով մեքենայի առաջամասում և թափքում գտնվող վեց զինծառայողներից կոչումով ավագ Հայկ Արշակի Դավթյանին պատճառվում է մահ, շարքային Գրիգոր Կարապետյանին՝ միջին ծանրության վնաս` առողջության տևական քայքայումով, Նիկոլայի առողջությանը թեթև վնաս` առողջության կարճատև քայքայումով, իսկ շարքայիններ Մենուայի, Շիրազի և Գևորգի առողջությանը՝ թեթև վնասի հատկանիշներ չպարունակող մարմնական վնասվածքներ: Դատաբժշկական փորձաքննության եզրակացության համաձայն` Հայկ Ա. Դավթյանի մահը վրա է հասել` գլխուղեղի կարևորագույն կենսական ֆունկցիաների սուր խանգարումից, գանգուղեղային բաց, բութ վնասվածք ստանալու հետևանքով…
Հետագայում Համլետ Վիրաբյանին մեղադրանք է առաջադրվում պաշտոնեական դիրքը չարաշահելու համար, որն անզգուշությամբ առաջացրել է մահ: Դատարանում արդեն Հ. Վիրաբյանը խորապես զղջացել է կատարածի համար, և ասել, որ ինքը խմած չի եղել, այն ստուգվել է, պարզապես շրջադարձ անելիս սխալ հաշվարկ է արել: Տուժողի իրավահաջորդին՝ Հայկի մորն ասել է, որ պատրաստ է հատուցել նրան, թեև ինչքան էլ հատուցի, քիչ է. ավելի լավ է՝ իր հետ պատահեր դա, քան երեխաների: Արմավիրի մարզի առաջին ատյանի դատարանը պատիժ նշանակելիս, մեղմացնող հանգամանք է դիտել այն, որ Համլետ Վիրաբյանը նախկինում դատված, արատավորված չի եղել, իրեն մեղավոր է ճանաչել, զղջացել և զղջում է կատարածի համար, դրականորեն է բնութագրվում ծառայության վայրի՝ զորամասի հրետանու պետ փոխգնդապետ Ս. Ավագյանի կողմից, խնամքին է մայրը և տատը, դատաքննության ընթացքում 1.000.000 դրամի չափով կամովին, տուժողի իրավահաջորդին հատուցել է ծախսերը…Իսկ պատիժը ծանրացնող հանգամանքներ դատարանը չի գտել և առաջադրված մեղադրանքի համար 30-ամյա Համլետ Վիրաբյանին դատապարտել է 4 տարի 6 ամիս ժամկետով ազատազրկման:
