Հասարակական պարեկ Ջորջ Ցիմերմանը սևամորթ դեռահաս Թրեյվոն Մարտինի սպանության գիշերը վիրավորվել է: Նման եզրակացություն է արել դեպքի առավոտյան Ցիմերմանին ստուգած բժիշկը: Փորձաքննության արդյունքները հայտնվել են ABC News-ի տրամադրության տակ:
Բժիշկը վկայություն է տվել, որ Մարտինի սպանությունից հետո առավոտյան Ցիմերմանի քիթը կոտրած է եղել, աչքերի տակ կապտուկները են եղել, գլխի վրա՝ բաց վերքեր: Եզրակացության մեջ նաև նշվում է, որ հիշելով անցյալ գիշերվա մասին՝ Ցիմերմանը բողոքել է սրտխառնոցից: Ուղեղի ցնցում, սակայն, նրա մոտ չի հայտնաբերվել: Եզրակացության մեջ բժիշկը խորհուրդ է տվել նրան այցելել հոգեբանի:
Այս փաստաթղթերը կօգտագործվեն Ցիմերմանի փաստաբանների կողմից: Հիշեցնենք. Ցիմերմանը կասկածվում է ռասայական խտրականության պատճառով դեռահաս սևամորթի սպանության մեջ: Նա, սակայն, իրեն մեղավոր չի ճանաչում՝ նշելով, որ դա ինքնապաշտպանություն է եղել: Նրա խոսքերով՝ Մարտինը հարձակվել է իր վրա, հարվածել դեմքին և գլուխը խփել ասֆալտին:
Հատկանշական է, որ սպանությունից մեկ ժամ հետո արված ոստիկանության տեսագրության մեջ երևում է, որ Ցիմերմանը ամուր կանգնած է ոտքերի վրա, իսկ գլխին նկատելի վնասվածքներ չկան, ինչպես որ հագուստի վրա արյան հետքեր չկան: ABC News-ն նաև նշում է, որ սպանության գիշերը պարեկը հրաժարվել է բժշկական ստուգումից:
Ցիմերմանը 17-ամյա Տրայվոն Մարտինին սպանել է Ֆլորիդայի Սենֆորդ քաղաքում փետրվարի 26-ին: Պարեկը հայտարարել էր, որ դեռահասն իրեն կասկածելի է թվացել, իրենց միջև վեճ է սկսվել, ինչի արդյունքում ինքը սպանել է նրան: Ավելի ուշ պարզվել է, որ Մարտինն անզեն է եղել: Ցիմերմանը ձերբակալվել է, սակայն հետո 150 հազար գրավի դիմաց ազատ է արձակվել: