Նյու Յորքի ոստիկանությունը չեղյալ է համարել ազատազրկման դատապարտված ռուս ձեռնարկատեր Վիկտոր Բուտին Ֆլորենս քաղաքի խիստ ռեժիմով բանտ ուղարկելու որոշումը: Այս մասին հաղորդում է ITAR-TASS-ը՝ վկայակոչելով Բուտի պաշտպաններին:
Բուտի փաստաբանները դատախազության որոշումը անվանել են «բարեհաջող» և հույս են հայտնել, որ արդյունքում Բուտին կուղարկեն ընդհանուր ռեժիմի այլ բանտ՝ Նյու Յորքից ոչ հեռու, որտեղ նրան կարող են այցելել Ռուսաստանի հյուպատոսության ներկայացուցիչները:
Բուտին Կոլորադոյի բանտ ուղարկելու որոշումը կայացվել էր ԱՄՆ բանտային պատժի դեպարտամենտի կողմից: Մայիսի 11-ին Բուտի փաստաբանները միջնորդություն ուղարկեցին դատավոր Շիրա Շեյնդլինի անունով՝ խնդրելով վերանայել այդ որոշումը:
Հիշեցնենք. 2012 թ. ապրիլի 5-ին Վիկտոր Բուտը դատապարտվել է 25 տարվա ազատազրկման՝ Կոլումբիայի FARC ահաբեկչական խմբավորմանը զենք վաճառելու մեղադրանքով: Ինքը՝ Բուտը, իրեն մեղավոր չի ճանաչում:
Կոլորադոյի Ֆլորենս քաղաքի բանտը, որը հայտնի է «Լեռնային Ալկատրաս» անվամբ, առավելագույնս խիստ ռեժիմ ունի: Դատապարտյալների մեծ մասը պահվում են մենախցերում օրական 23 ժամ և մեկ ժամ դուրս են գալիս միայնակ զբոսանքի: Բանտում հիմնականում պահվում են ահաբեկիչները, խոշոր թմրավաճառները և կազմակերպված հանցավոր խմբավորումների անդամները: