Կալիֆոռնիա նահանգի խորհրդարանի անդամներ Էնթոնի Փորտանինոն, Կարո Աչաջյանը և սենատոր Ջո Սիմիտիան առաջարկել են օրինագիծ` ապրիլի 24-ը նշել որպես «Հայոց ցեղասպանության հիշատակի օր Կալիֆոռնիայում»: Այս մասին տեղեկացնում է թուրքական Today’s Zaman-ը:
Ամեն տարի հայամետ սենատոները ներկայացնում են նման օրինագծեր, որոնք մտնում են նահանգի խորհրդարան, բայց չեն ընդունվում դաշնային մակարդակով: Ներկայացված որոշումը նաև հորդորում է ԱՄՆ նախագահ Բարաք Օբամային և ԱՄՆ Կոնգրեսին պաշտոնապես ընդունել Հայոց ցեղասպանությունը:
«Հայոց եղեռնը ժամանակակից պատմության ամենամեծ հանցագործություններից է և այն արհամարհելը նշանակում է ներել»,- ասել է Փորտանինոն:
«Հայ ժողովրդի հանդեպ կատարված թուրքերի հանցանքը երբեք չպետք է մոռացվի»,- ասել է Մայք Գատտոն` օրինագծի համահեղինակներից մեկը և ավելացրել. «Եվս մեկ անգամ ԱՄՆ-ի ամենամեծ նահանգը պիտի հիշեցնի աշխարհին այս իրողության մասին: Մենք կոչ ենք անում ամբողջ երկրին կանգնել մեզ հետ և նույնը անել»:
