Հայաստանում ամեն ինչ հնարավոր է, ինչպես ներկայացվող դեպքում: Մի ընտանիքից երեք տղամարդ, որոնցից 2-ը ոստիկան, ոստիկանությանը դիմադրություն ցույց տալու համար հայտնվել են ոստիկանության Արարատի մարզային վարչության Վեդիի բաժնում: Նրանցից մեկը` ոստիկանության պահպանության բաժանմունքի պետ Ռազմիկ Արթենյանը հայտարարել է, որ ոստիկանության Վեդիի բաժնի պետն է իրենց գլխին «սարքել»:
Ոստիկանության ՊՊՎ Արարատի բաժնին կից պահպանության բաժանմունքի արդեն նախկին պետ Ռազմիկ Արթենյանը դատաքննության ընթացքում հայտնել է, որ դեպքին նախորդող ժամանակաշրջանում աշխատանքային գործունեության հետ կապված իր և ոստիկանության Արարատի բաժնի պետ Սևան Քոչարյանի փոխհարաբերությունները լարված են եղել: 2011թ. հունվարի 21-ին, ժամը 23-ի սահմաններում, երբ ինքը տանն է եղել, հեռախոսով տեղեկացել է, որ իր 22-ամյա որդի Սրապիոնի հետ կապված ինչ-որ կոնֆլիկտ է ստեղծվել Վեդիի սկզբնամասում գտնվող գազալցակայանում: Այդ ժամանակ իր մյուս որդիների` Սամվելի, Սևակի և եղբոր որդու հետ մեկնել է այնտեղ: Ճանապարհին հանդիպել է որդուն` Սրապիոնին, որը եղել է ծեծված վիճակում, լացակումաց: Վերջինս դեպքի հետ կապված հորն ասել է, որ ինքը ոստիկաններին ասել է` «ցավներդ տանեմ», իսկ նրանք իրեն մայր են հայհոյել: Կատարվածը պարզելու նպատակով իրենք գնացել են գազալցակայան, որտեղ հավաքված բազմություն է եղել: Հայր Արթենյանն իր հետ եկած անձանց հանձնարարել է մնալ ավտոմեքենաների մեջ, իսկ ինքն իջել է ոստիկաններից պարզելու դեպքի հանգամանքները: Վերջիններս` Ատոմ Ասատրյանն ու Ռուբիկ Սաղաթելյանը, հայտնել են, որ Ռազմիկի որդուն չեն ծեծել ու հայհոյել: Ռազմիկը կոլեգաներին առաջարկել է գնալ ոստիկանության Արարատի բաժին, և ավտոմեքենան նստելիս կրակոցի ձայն է լսել, երբ շրջվել է, տեսել է, որ կրակողը Ռուբիկ Սաղաթելյանն է, ով իրեն անհայտ պատճառով օդ է կրակել: Դրանից հետո Արթենյանները հեռացել են գազալցակայանից: Ռազմիկ Արթենյանի պատմելով` իրենք դեպքի վայրում որևէ ոստիկանի չեն հարվածել, ինքն անձամբ Ռուբիկին չի հարվածել, իրենց և ոստիկանների միջև վեճ չի եղել: Դեպքից հետո, երբ Սրապիոնին տարել են տուն, իսկ ինքն ու որդին` Սամվել Արթենյանը գնացել են ոստիկանության Վեդիի բաժին, իրենց առանց համապատասխան ձևակերպումներ կատարելու ձերբակալվածի կարգավիճակով պահել են այնտեղ:
Ռ. Արթենյանը դատարանին հայտնել է նաև, որ գործը շինծու է և ծրագրել է Վեդիի ոստիկանապետ Սևան Քոչարյանը Վեդիի քաղաքապետ Վարուժան Բարսեղյանի ու նրա եղբայր Արտակ Բարսեղյանի թելադրանքով, քանի որ նրանք նպատակ են ունեցել այդ ճանապարհով խլելու իր հարազատների խանութը: Իրականում Վեդիի ոստիկանության բաժնում կռվի մասին որևէ ահազանգ չի եղել, քանի որ իր որդին Էդգար Զաքոյան անձի հետ չի վիճել ու չի կռվել:
Իսկ մեղադրականում, այնուհետև դատաքննությամբ քրգործն այսպիսի տեսք է ստացել. 2011թ. հունվարի 21-ին ժամը 23.50-ի սահմաններում, ոստիկանության Արարատի մարզային վարչության Արարատի բաժնում ահանզանգ է ստացվել` Վեդիի գազալցակայանի դիմաց տեղի ունեցող կռվի մասին: Դեպքի վայր են ուղարկել նույն բաժնի քրեական հետախուզության բաժանմունքի օպերլիազոր Ատոմ Ասատրյանը, անչափահասների գործերով բաժանմունքի ավագ օպերլիազոր Ռուբիկ Սաղաթելյանը և տեսուչ Ռոման Միսակյանը: Հասնելով դեպքի վայր, ոստիկաններն այնտեղ տեսել են Սարգիս Արթենյանին ու նրա ընկերոջը` Արայիկ Խաչիկյանին՝ «Տուառեգ» մակնիշի ավտոմեքենայով: Ոստիկանները նրանց հարցրել են, թե` այդտեղ կռիվ չի՞ եղել: Այդտեղից հեռացած Սրապիոնը նկատելով իր հորեղբոր որդուն` Սարգսին մոտեցած ոստիկաններին, ավտոմեքենայով շրջադարձ է կատարել, վերադարձել նրանց մոտ: Ոստիկանները նկատելով Սրապիոն Արթենյանի դեմքի այտուցվածությունն ու հագուստի արյան հետքերը, կասկածելով դեպքի հետ նրա առնչություն ունենալու մեջ, նրանից ևս փորձել են ճշտել տեղի ունեցած ինչ-որ կռվի մանրամասներ: Սակայն Սրապիոնը ագրեսիվորեն պահանջել է ոստիկաններից` հեռանալ դեպքի վայրից: Ծառայության բերումով ճանաչելով Սրապիոնի հորը` Ռազմիկին, որդուն կարգի հրավիրելու նպատակով, ոստիկանները փորձել են նրան հեռախոսով հրավիրել դեպքի վայր, սակայն Սրապիոնը հրաժարվել է տալ հոր հեռախոսահամարը, ասելով, որ այդքան չկան, որ հոր հեռախոսահամարը տա նրանց: Այդ ժամանակ, երբ Սրապիոնից և Սարգսից պահանջել են՝ նստել ավտոմեքենան և ներկայանալ ոստիկանության բաժին, սակայն Սրապիոնը չի ենթարկվել, դիմադրել է ոստիկաններին, հայհոյել ու բռունցքով հարվածել է Ռուբիկ Սաղաթելյանի դեմքին: Հետո վերջինս զանգահարել է հերթապահ մաս և լրացուցիչ ուժեր պահանջել: Սարգիսն էլ զանգահարել է Ռազմիկ հորեղբորը: Վերջինս իր մյուս որդիների ոստիկանության Վայոց ձորի մարզային վարչության Վայքի բաժնի տեսուչ հերթապահ Սամվել Արթենյանի և Սևակ Արթենյանի հետ գնացել են լցակայան: Այդ ընթացքում Սրապիոնն ու Սարգիսը ավտոմեքենայով հեռացել են գազալցակայանից և ճանապարհին հանդիպել Ռազմիկ Արթենյանին ու մյուսներին: Սրապիոնը հորը հայտնել է, որ ոստիկաններն իրեն ծեծել են, մայր հայհոյել և ցանկացել իրեն բաժին տանել: Արթենյանները, գնացել են գազալցակայանի մոտ, Ռազմիկը մոտեցել է Ռուբիկ Սաղաթելյանին և առանց նրա բացատրությունները լսելու, հայհոյելով` բռունցքով հարվածել է Ռուբիկի վերին շրթունքին, իսկ նրա որդիներ Սամվելն ու Սրապիոնը ձեռքերով են հարվածել: Սաղաթելյանը հետ-հետ է գնացել ու ընկել մետաղական ցանցերով պատված ջրափոսի մեջ: Դրանից հետո Սամվելը բռունցքով հարվածել է Ատոմի գլխին, ինչից նա ուղեղի ցնցում է ստացել, իսկ Սրապիոն Արթենյանը բռունցքով հարվածել է Ռոման Միսակյանին և քերծել նրա ծոծրակը: Ստացված հարվածից Ատոմը կքանստել է, իսկ Ռ. Սաղաթելյանն ատրճանակից օդ է կրակել՝ Արթենյանների հարձակումները կանխելու համար: Հետագայում նախաքննական մարմինը պարզել է, որ նշյալ գազալցակայանի դիմաց Սրապիոնը վիճել է Ավշար գյուղի բնակիչ էդգար Զաքոյանի հետ, որի ընթացքում բռունցքներով միմյանց ծեծել են, որի կապակցությամբ հարուցվել է քրգործ և 2 օր անց կարճվել` բողոքի բացակայության հիմքով: Դա՝ ըստ քրգործի, մինչդեռ Սրապիոնը ժխտել է Զաքոյանի հետ վեճի մասը և դատարանում պատմել է, որ այդ օրը մտերիմներով խնջույք են կազմակերպել Վեդիի ոստիկանության հարևանությամբ գտնվող սրճարանում, որի ընթացքում ոստիկաններն ու ոստիկանության բաժնի պետ Սևան Քոչարյանն անընդհատ հետևել են իրենց: Ժամը 23-ի սահմաններում, ավտոմեքենան լիցքավորելու համար գնացել է գազալցակայան ու այնտեղ տեսնելով հավաքված մարդկանց մի պահ իջել է ավտոմեքենայից, սակայն կրկին նստել ու վերադարձել է սրճարան, որտեղ էլ նկատել է, որ հեռախոսը կորցրել է: Այն փնտրելու համար հորեղբոր որդի Զորիկի «Պաջեռո» ավտոմեքենայով ու ճանապարհին հանդիպած հորեղբոր մյուս որդու` Սարգսի ու նրա ընկեր Արայիկի հետ, ովքեր իր պահանջով «Տուառեգ» ավտոմեքենայով հետևել են իրեն, միասին գազալցակայանի տարածքում փնտրել, գտել են հեռախոսը: Երբ իր մեքենայով շրջադարձ է կատարել, որ հեռանա տարածքից, նկատել է, որ Սարգսի մեքենային է մոտեցել մի «Ժիգուլի»: Ինքը վերադարձել, իջել է մեքենայից ու մոտեցել քաղաքացիական հագուստով 3 անձանց: Վերջիններս հետաքրքրվել են ինչ-որ կռվի մասին: Ինքը սիրալիր տոնով նրանց դիմելով հարցրել է՝ «ի՞նչ է եղել, ցավներդ տանեմ», սակայն նրանցից մեկը հեգնանքով պատասխանել է` «Դու մեր ցավը չես կարող տանես», որի շուրջ իրենց միջև լեզվակռիվ է ծագել, ու այդ ընթացքում սկզբից Ռոման Միսակյանն, ապա Ռուբիկ Սաղաթելյանն իրեն հարվածել են, որոնց հարվածներից ինքը վայր է ընկել ու գետնին ընկած վիճակում նրանք շարունակել են իրեն ծեծել: Դրանից զայրացած` ինքը գետնից բարձրացել և ոտքով հարվածել է ոստիկանների մեքենային ու հեռացել: Սակայն ճանապարհին հանդիպել է հորն ու եղբորը, միասին գնացել են լցակայան, որտեղ հայրն իջել և միայնակ մոտեցել է Ռուբիկ Սաղաթելյանին: Մեկ րոպե անց իջել են նաև ինքն ու եղբայրը և լսել հոր խոսակցությունը: Լսել է նաև Ռոմանի ձայնը, ով հորը դիմելով ասել է. «Դու պրոբլեմ ես ունենալու» ու այդ պահին կրակոցի ձայն է լսել, որից հետո իրենք նստել են ավտոմեքենաներն ու հեռացել: Միասին տուն են գնացել, որից հետո հայրն ու եղբայրը գնացել են ոստիկանության Վեդիի բաժին, իսկ ինքը գնացել է հորեղբոր տուն: Առավոտյան է տեղեկացել, որ հայրն ու եղբայրը դեռ բաժնում են, նույն օրը ինքնակամ ներկայացել է Արմավիրի մարզի ոստիկանություն, որտեղից էլ տեղափոխվել է Վեդիի բաժին: Պնդել է, որ Էդգար Զաքոյանին չի ճանաչում, վերնաշապիկն արյունոտվել է ոստիկանների հարվածների հետևանքով, նրանց չի հայհոյել ու չի հարվածել: Նշել է նաև, որ նախաքննության ընթացքում իր իրավունքները խախտվել են, Վեդիի բաժնում Սևան Քոչարյանն իրեն ծեծել է, նախաքննությամբ որպես կասկածյալ և մեղադրյալ տված իր ցուցմունքները գրել է քննիչի թելադրանքով: Վերջինս իրեն հորդորել նման ցուցմունք տալ, որպեսզի կարողանան օգնել հորն ու եղբորը, որոնք գտնվում էին կալանքի տակ, սակայն չեն օգնել: Արարատի և Վայոց ձորի մարզերի առաջին ատյանի դատարանը մեղավոր է ճանաչել նրանց. Ռազմիկ Արթենյանին (քր. օրի 316-րդ հոդ. 2-րդ մաս) դատապարտել է 5 տարվա ազատազրկման և որպես մարտական գործողությունների մասնակցի` համաներմամբ ազատել պատժից: Սամվել Արթենյանին ևս մեղավոր է ճանաչել նույն հոդվածով, դատապարտել ազատազրկման 5 տարի ժամկետով, սակայն մինչև 3 տարեկան երեխա ունենալու հիմքով, համաներմամբ ազատել կալանքից ու պատժից: Սրապիոն Ռազմիկի Արթենյանին դատարանը մեղավոր է ճանաչել քր. օրի 316-րդ հոդվածի 1-ին մասով և դատապարտել ազատազրկման 4 տարով, կիրառել է համաներում և նրա պատժաչափի չկրած մասը կրճատել 1/3-ով` խափանման միջոց կալանքը թողնելով անփոփոխ:
