Տավուշի մարզի ընդհանուր իրավասության դատարանում այսօր հարցաքննման ենթակա վկաների բացակայության պատճառով հետաձգվել է 2010 թ. հուլիսի վերջին Տավուշի մարզի մարտական դիրքերում սպանված լեյտենանտ Արտակ Նազարյանի մահվան գործով դատավարությունը: Դատարանում այսօր պետք է ցուցմունք տային առանցքային վկաներից Արման Մնացականյանը և Արտյոմ Մկրտչյանը:
Հիշեցնենք, որ Արման Մնացականյանը այն վկան էր, որը երկար ժամանակ անհասկանալի պայմաններում պահվում էր ՌՈ-ում, և նրա ցուցմունքներում տուժողի իրավահաջորդի ներկայացուցիչները շատ հակասություններ էին արձանագրել, որոնք ուսումնասիրման առարկա էին: Տուժող կողմը մինչ օրս պնդում է, որ Ա. Մնացականյանից նախաքննական ցուցմունքները ձեռք են բերվել ապօրինաբար: Ռազմական ոստիկանության կողմից նրա վրա ճնշումներ են գործադրվել` դեպքից հետո նրան և մի քանի այլ զինծառայողների տարել են Բերդ քաղաքի ռազմական ոստիկանություն և պահել քսաներեք օր: Դատարանում Ա. Մնացականյանը նաև նշել է` հայտնի չէ, թե իրեն երբ են զորացրելու: Վկան ապօրինաբար պահվել է ռազմական ոստիկանությունում: Նա նույնիսկ դատարանի դահլիճ ներկայանում էր ռազմական ոստիկանների ուղեկցությամբ, իսկ առանցքային վկայի ցուցմունքներում առկա հակասությունները տուժող կողմի ներկայացուցիչները պայմանավորում էին նրանով, որ ցուցմունքները ձեռք են բերվել ապօրինի ճանապարհով:
Արտակ Նազարյանի իրավահաջորդի ներկայացուցիչ Ռուբեն Մարտիրոսյանը «Առաջին լրատվական»-ի հետ զրույցում նշեց, որ դատարանում այսօր Արման Մնացականյանի բացակայության պատճառները ներկայացրել է Արմավիրի մարզի ոստիկանության ներկայացուցիչը, որը հայտնել է, որ տղան առողջական խնդիրների պատճառով հանրապետությունից դուրս է մեկնել` բուժման նպատակով, սակայն որևէ փաստաթուղթ կամ տեղեկանք սրա վերաբերյալ դատարանին չի ներկայացվել: Իսկ գործով մյուս վկայի` Արտյոմ Մկրտչյանի բացակայությունը որևէ կերպ չի պարզաբանվել, սակայն, Ռուբեն Մարտիրոսյանի համոզմամբ, այս վկան դատարան չի գալիս, քանի որ ահաբեկված է, ճիշտ այնպես, ինչպես նախաքննության ժամանակ. «Նա այն վկան է, որը հրաժարվեց նախաքննության ընթացքում տված ցուցմունքներից ու հայտարարեց, որ դրանք իրենից այլ ճանապարհներով են կորզվել»,- մեզ հետ զրույցում նշեց իրավապաշտպանը:
Գործով հաջորդ դատական նիստը դատարանն այսօր նշանակել է հաջորդ շաբաթվա մեջ, սակայն, իրավապաշտպանի փոխանցմամբ, պաշտպաններից մեկի բացակայության պատճառով այն չի կայանա և կտեղափոխվի դրան հաջորդող շաբաթ: