«Յուրաքանչյուր վատ խաղաղություն ավելի լավ է, քան պատերազմը:
Նրանք, ովքեր կարծում են, թե ռազմական գործողություններով կարող են հակամարտություններ լուծել, պատրանքի մեջ են, որովհետև պատերազմից հետո պետք է վերադառնալ բանակցությունների սեղանի շուրջ, սակայն ավելի վատ պայմաններով»,- ասել է Էդվարդ Նալբանդյանը, ռուսական Russia Today հեռուստաընկերությանը տված հարցազրույցում:
Նալբանդյանը կարծիք է հայտնել, որ ժամանակը հակամարտության կողմերից ոչ մեկի օգտին չէ: Նա չի համաձայնել այն կարծիքին, որ կողմերի դիրքորոշումները չեն մոտեցել և շեշտել է, որ հակամարտության կարգավորմանը շատ մոտ են եղել 2001-ին:
Բայց Ադրբեջանի այն ժամանակվա նախագահ Հեյդար Ալիևը հրաժարվել է փարիզյան բանակցությունների արդյունքներից, սակայն այդ սկզբունքները հետագայում ամրագրվել են Քի Վեսթում:
Կողմերի զինված ուժերի շփման գծում հաճախակի բախումների պատճառը ՀՀ արտգործնախարարը տեսնում է Ադրբեջանի կողմից միջազգային հանրության առաջարկները չկատարելու մեջ,- մասնավորապես` ճակատից դիպուկահարների դուրսբերումը,- իսկ արձանագրվող միջադեպերի զոհերին երկրի ներսում հերոս և շահիդ ներկայացնելով` փորձում են կրոնական երանգավորում տալ հակամարտությանը:
Անդրադառնալով հայ-թուրքական հաշտեցման գործընթացին` Նալբանդյանը Անկարայի դիրքորոշումը ապակառուցողական է համարել, քանի որ արձանագրությունների ստորագրումից հետո Թուրքիան չի հետևել դրանց` հարաբերությունների կարգավորումը հայ-ադրբեջանական հակամարտության կարգավորման հետ կապելով, և դա այն դեպքում, երբ Հայաստանը գործընթացը սկսել է առանց նախապայմանների:
Թուրքիայի այս դիրքորոշումը որոշակիորեն վնասում է նաև ղարաբաղյան հակամարտության կարգավորմանը:
