ԱՄՆ նախագահ Բարաք Օբամայի նախընտրական շտաբը թողարկել է տեսահոլովակ, որում Օբամայի հավանական մրցակից, Մասաչուսեթսի նախկին նահանգապետ Միթ Ռոմնին մեղադրվում է պողպատաձուլական գործարանը սնանկացման շեմին հասցնելու մեջ։ Այս մասին հաղորդում է rosbalt.ru-ն:
Հոլովակի տևողությունը 6 րոպե է: Այն ցանցում հայտնվել է մայիսի 14-ին:
Գործարանի բանվորները պատմում են այն մասին, թե ինչ է տեղի ունեցել այն բանից հետո, երբ 1993 թվականին ընկերությունն անցել է Ռոմնիի Bain Capital ներդրումային ընկերությանը:
Ինչպես վստահեցնում են Օբամայի քաղտեխնոլոգները, այդ ընկերությունը գործարանից քամել է ողջ շահույթը` ընկերությանը թողնելով պարտքերի մեջ: Երբ ընկերությունը սնանկացել է, աշխատողները չեն կարողացել ամբողջ ծավալով ստանալ թոշակները և բժշկական ապահովագրությունները: Աշխատանքից զրկվել է 750 մարդ:
Ինչպես գրում է Lenta.ru-ն, ընկերությունը սնանկացման մասին հայտարարել է 2001 թվականին: Այդ ժամանակ Ռոմնին Bain Capital-ն այլևս չէր ղեկավարում. նա ընկերությունից հեռացել էր 1999 թվականին:
Պաշտոնապես Ռոմնին դեռ չի դարձել հանրապետականների նախագահի թեկնածու: