Պենտագոնը նախատեսում է իր զինված ուժերի ռազմական ինքնաթիռները մինչև 2020 թ. փոխարինել 5-րդ սերնդի F-35 «Լայթինգ II» կործանիչներով: Ինչպես հաղորդում է ITAR-TASS-ը, այդ ծրագրի համաձայն՝ մինչև ընթացիկ տասնամյակի ավարտը պետք է արտադրվի այդ տեսակի 2443 ինքնաթիռ, որոնք կընդգրկվեն ԱՄՆ ռազմածովային, ռազմաօդային և ծովային հետևակի կորպուսի ուժերում:
Ինքնաթիռի տարբերակներից մեկը՝ F-35A-ն մշակվել է հատուկ ռազմաօդային ուժերի համար և կփոխարինի F-16 և F-18 կործանիչներին և A-10 «Տանդերբոլտ» գրոհային ինքնաթիռներին: Երկրորդ տարբերակը՝ F-35C-ն, նախատեսված է ավիակիրների համար և կզբաղեցնի F/A-18-ի տեղը: Երրորդ տարբերակը՝ F-35B-ն, կփոխարինի «Հարիեր»-ին:
Եվս մի քանի հարյուր F-35 ինքնաթիռներ կարտադրվեն 8 միջազգային գործընկերների համար, որոնք ներդրումներ են կատարել նախագծում. Ավստրալիա, Մեծ Բրիտանիա, Կանադա, Դանիա, Իտալիա, Նիդեռլանդներ, Նորվեգիա և Թուրքիա: Այսօրվա դրությամբ կա ևս երկու պատվիրատու՝ Ճապոնիան և Իսրայելը:
Խոսելով երկրի զինված ուժերը նոր կործանիչներով փոխարինելու նպատակահարմարության մասին՝ ամերիկյան զինծառայողները մատնանշում են Չինաստանի գնալով աճող հզորությունը: Բացի այդ, այս պահին Պեկինը շարունակում է մշակել սեփական 5-րդ սերնդի J-20 կործանիչը: