ԱՄՆ-ում 25 տարվա ազատազրկման դատապարտված ռուս գործարար Վիկտրո Բուտը իր դեմ գործադրվող ճնշումը համեմատել է «վհուկների դեմ միջնադարյան դատաստանի» հետ: Russia Today հեռուստաալիքին նա հայտնել է, որ իրավիճակը շտկելու հույս չունի, իսկ դատարանի գործողությունները որակել է որպես «քաղաքական» և «հակառուսական»:
«Ես գիտեմ, որ նման պատժի ենթարկվելու համար ոչինչ չեմ արել,- ասել է Բուտը:- Հանցագործությունները, որոնք ինձ վերագրվում են, չեն էլ եղել. դրանք հորինել է ԱՄՆ կառավարությունը՝ դրանց փակցնելով «դավադրության», «ամերիկացիներին սպանելու մտադրության» պիտակներ: Այս բոլոր տերմինները պետք է որ որոշակի ազդեցություն ունենային ատենակալների վրա: Դատական գործընթացը շատ էր հիշեցնում միջնադարյան դատարանները վհուկների դեմ, երբ ինկվիզիցիայի ենթարկողների առաջ պետք էր խոստովանել սեփական հանցագործությունները»:
Անդրադառնալով իրեն Թաիլադնից արտահանձնելու խնդրին, նա հիշեցրել է, որ սկզբնապես Բանգկոկի քրեական դատարանը հրաժարվում էր իրեն հանձնել, որին ի պատասխան ԱՄՆ-ը աննախադեպ ճնշում է գործադրել թագավորության կառավարության վրա: «Նրանք պարզապես գնեցին ինձ, ոչ մի արտահանձնում չի եղել: Մեզ մոտ դեռ չէին ավարտվել դատական լսումները Թաիլանդում»:
Հիշեցնենք. 2011 թ. նոյեմբերի 2-ին 45-ամյա Վիկտոր Բուտը մեղավոր է ճանաչվել մեղադրանքի 4 կետով, այդ թվում՝ դավադրության նպատակով ԱՄՆ քաղաքացիների սպանություն և համագործակցություն Կոլումբիայի ահաբեկչական խմբավորումների հետ: