REGNUM գործակալությոան երևանյան բյուրոյի խմբագիր Ռուբեն Գրձելյանը մայիսի 12-ին՝ ժամը 23:00-ի սահմաններում, դաժան ծեծի է ենթարկվել մի խումբ մարդկանց կողմից, որոնց մեջ, ինչպես հաջողվել է պարզել, եղել է Կոտայքի մարզի հետաքննության օրինականության վերահսկման հարցերով դատախազ Մովսես Մանրիկյանը: Դեպքը տեղի է ունեցել Երևանում՝ տուժածի մոր, նրա երկու անչափահաս երեխաների և հղի կնոջ ներկայությամբ, երբ ընտանիքը երեկոյան զբոսանքի էր դուրս եկել:
REGNUM-ը գրում է, որ վեճն սկսվել է այն բանից հետո, երբ երեխաները մի պահ խանգարել են ենթադրաբար Մանրիկյանի որդուն պատկանող մեքենային դուրս գալ բակից: Դա դուր չի եկել Մանրիկյանին, որը սկսել է վիճել Գրձելյանը հետ և հարվածել է նրան: Պատասխն ստանալով՝ Մանրիկյանը և նրան ուղեկցող անձինք հարձակվել են լրագրողի վրա, իսկ մի քանի վայրկյան անց նրանց միացել է Մանրիկյանի որդին և ևս մի քանի անձ: Նրանք սկսել են ծեծել Գրձելյանին, մինչև որ վերջինս կորցրել է գիտակցությունը:
Դրանից անմիջապես հետո Ռուբեն Գրձելյանը հայտարարություն է ներկայացրել Երևանի ոստիկանության Էրեբունու բաժին և բժշկական հետազոտություն անցել: Հայտարարություն ներկայացնելիս նա դեռևս չգիտեր, որ իրեն ծեծի ենթարկողների մեջ եղել է բարձրաստիճան պետական ծառայող: Դա պարզվել է հաջորդ օրն առավոտյան՝ ականատեսների պատմածներից:
