Դժվար է հավատալ, որ Հայաստանի ու Իրանի միջև երբևէ կարող է նավթամուղ կառուցվել: Այս մասին 1in.am-ի հետ զրույցում ասաց տնտեսագետ Վահագն Խաչատրյանը: «Նավթամուղի պարագայում նավթի վերամշակման խնդիր կարող է առաջանալ: Բայց նավթավերամշակման ձեռնարկությունը համարվում է բարձր տեխնոլոգիական և միշտ գտնվում է այն երկրների հսկողության տակ, ովքեր այդ տեխնոլոգիան կարող են վաճառել: Օրինակ` Ռուսաստանը վերջին 20 տարիներին ոչ մի նոր նավթավերամշակման ձեռնարկություն չի կառուցել: Այսինքն` դա այնքան էլ հեշտ գործ չէ»,- կարծում է տնտեսագետը: Հայաստան-Իրան երկաթուղին ևս Վ. Խաչատրյանը իրական չի համարում: «Հայաստանը այդ գումարները չունի, իսկ թե ով պետք է տա, պարզ չէ: Հերթական պարտք վերցնելն էլ անմաստ եմ համարում: Թե ինչ են տեղափոխելու այդ երկաթգծով, որպեսզի ապրանքի ինքնարժեքը շատ բարձր չլինի ու մրցունակ լինի, չեմ պատկերացնում: Առավել ևս պետք է հաշվի առնել, որ կառուցվում է Ռուսաստան-Ադրբեջան-Իրան երկաթուղին, որը մոտ ժամանակներս կշահագործվի»,- նշեց Վ. Խաչատրյանը: