«Առաջին լրատվականի» հարցերին է պատասխանում Կոնգրեսի ներկայացուցիչ Վլադիմիր Կարապետյանը:
– Խոսելով Թուրքիայի հետ հարաբերությունների մասին՝ Սերժ Սարգսյանը ռուսական «Էխո Մոսկվի» ռադիոկայանին տված հարցազրույցում ասել է, որ Հայաստանը կարող է հետ կանչել իր ստորագրությունը արձանագրություններից, եթե Թուրքիան շարունակի միջամտել ղարաբաղյան գործընթացին: Ինչպե՞ս եք մեկնաբանում այս հայտարարությունը, ձեր կարծիքով` ի՞նչ նպատակ է հետապնդում նրա այս հայտարարությունը:
– Այդ հարցազրույցով Սերժ Սարգսյանը հաստատում է, որ գործընթացը կատարյալ ձախողման մեջ է: Նա նաև պետք է խոստովանի, որ այդ ձախողման հիմքերը դրել է ինքը` նախաձեռնելով այդ պրոցեսը և հնարավորություն ընձեռելով Թուրքիային ներգրավել Լեռնային Ղարաբաղի խնդրի խաղաղ կարգավորման գործընթացի մեջ:
Հայ ազգային կոնգրեսը այդ պրոցեսի մեկնարկից անմիջապես հետո հայտարարեց, որ սպասվում է երկկողմ հարաբերությունների վատթարացում, ոչ թե սահմանների բացում: Դա շատ պարզ էր: Սերժ Սարգսյանը արձանագրությունների համար գին վճարեց, այսինքն` համաձայնեց պատմաբանների ենթահաձնաժողովի ստեղծմանը, որպեսզի թուրքերը շարունակեն պահանջատիրական մոտեցումները Հայաստանի նկատմամբ:
Մենք ունեցանք այն, ինչ որ երկար ժամանակ կանխատեսել էինք, և մեզ համար ակնհայտ էր այս ելքը: Ափսոսում եմ, որ իշխանությունը` իր վերլուծաբաններով, ԱԳՆ-ով, նախագահի խորհրդականով, գնաց նման արկածախնդրության, որի հանգրվանը երկկողմ հարաբերությունների վատթարացումն էր:
– Պարոն Կարապետյան, Ս.Սարգսյանը, երբ նախաձեռնեց «ֆուտբոլային դիվանագիտությունը», համոզմունք կար, որ դա միջազգային հանրությանն ուղղված քայլ էր` սեփական լեգիտիմությունը ամրացնելու ճանապարհին: Այժմ հնարավո՞ր է, որ իսկապես նա հետ կանչի ստորագրությունը` ներքին սպառման համար, արդեն հաջորդ ընտրություններում համապատասխան դիվիդենտներ շահելու նպատակով:
– Ես կասկածում եմ, որ Սերժ Սարգսյանը այդ համարձակությունը ունի` նման քայլի գնալու: Նրա համարձակությունը միայն հերիքում է պետության բռնապետական ողջ մեխանիզմը օգտագործել տասը քաղբանտարկյալ պահելու համար:
Սրանք են նրա իրական պատկերացումները: Ես գրեթե բացառում եմ, որ նա նման կտրուկ քայլի գնա: Դրանք ընդամենը նախազգուշացումներ են` ոչ ավելին:
