Հենց բախումները սկսեցին Եգիպտոսում, Wikileaks-ը Մուբարաքին ռմբակոծեց սկանդալային նոր փաստաթղթերով

Հենց Եգիպտոսում սկսվեցին բախումները, եգիպտացի ցուցարարները անսպասելիորեն աջակցություն ստացան Wikileaks-ից, որը հրապարակեց մի քանի տասնյակ փաստաթղթեր, որտեղ ամերիկյան դիվանագետները ներկայացնում են իրական Եգիպտոսն իր բազմաթիվ խնդիրներով, հատկապես մարդու իրավունքների ոլորտում` ճնշումներ ոստիկանությունում, բլոգերների և լրագրողների ճնշում: Մի փաստաթղթում նշված է, որ ԱՄՆ-ից ֆինանսական և ռազմական օգնություն ստացող Մուբարաքի իշխանության օրոք բռնաճնշումներն ու խոշտանգումներն ամենուր են: Բանտերում են գտնվում բազմաթիվ մարդիկ, որոնք ձերբակալվել են քաղաքական հայացքների համար:
Շատերը սա հարված են համարում նաև Միացյալ Նահանգներին, քանի որ բոլոր այն զինվորականները, որոնք, ըստ փաստաթղթերի, ներգրավված են անօրինական գործողությունների մեջ, մարզումներ են անցել ԱՄՆ-ում:
Փաստաթղթերից մեկում էլ նշվում է, որ ամերիկյան իշխանությունները աջակցություն են ցուցաբերել նաև եգիպտական ընդդիմությանը` ժողովրդավարական գործընթացներին աջակցության ծրագրերի շրջանակներում: Այս ծրագրերի վերաբերյալ երկրի նախագահը միշտ բացասաբար է արտահայտվել: