Կենտրոն և Նորք-Մարաշ վարչական շրջանների ընդհանուր իրավասության դատարանում այսօր կրկին հետաձգվեց նախկին քաղբանտարկյալ Վարդգես Գասպարիի դեմ հարուցված քրեական գործի դատաքննությունը:
Անհայտ պատճառներով դատարան չէին ներկայացել պատշաճ ծանուցված վկաներ Լյուդվիգ Բախշյանն և Ստեփան Բաբայանը: Այնպես որ, դատավոր Մխիթար Պապոյանը երեկ որոշում կայացրեց նրանց բերման ենթարկելու մասին:
Հիշեցնենք, որ Գասպարին 2010 թ. բերման է ենթարկվել ոստիկանների կողմից այն բանի համար, որ մասնակցել է ՀՀ կառավարության շենքի դիմաց կազմակերպված խաղաղ հանրահավաքին, բղավել է, խանգարել է ներկաների հանգիստը: Ըստ մեղադրանքի` նա 2011 թ. հոկտեմբերի 20-ին ժամը 12.00-ի սահմաններում ՀՀ կառավարության թիվ 1 շենքի մոտակայքում, դիտավորությամբ կոպիտ կերպով խախտելով հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք դրսևորելով, շուրջ 15 րոպե տևողությամբ աղմկել է և հայհոյել, իր այդ դիտավորյալ գործողություններով խանգարել անցորդների և ներկաների հանգիստը:
Դատական հաջորդ նիստը նշանակվեց մայիսի 29-ին՝ ժ. 9.30-ին:
