«Սովարաբար անպտղություն ենք անվանում այն ամուսնությունը, երբ առանց հակաբեղմնավորիչների օգտագործման զույգը մեկ տարվա ընթացքում ապրում է կանոնավոր սեռական կյանքով և մեկ տարին լրանալուց հետո հղիություն չի գրանցվում: Այս դեպքում նոր կարող ենք համարել, որ զույգը անպտուղ է»,- լրագրողների հետ հանդիպմանն ասաց բժիշկ-սեքսապաթոլոգ Վրեժ Շահրամանյանը: Ըստ նրա՝ Հայաստանում անպտղությունը ավելի է տարածվել. «Մեր կլինիկա դիմող յուրաքանչյուր երրորդ զույգի մոտ ախտորոշվում է անպտղություն: Իհարկե, մենք ամեն ինչ անում ենք, որ նրանց խուճապի չմատնենք, բայց անպտղություն բուժելը երկար և ծախսատար գործընթաց է»:
Շահրամանյանի խոսքերով՝ երբ զույգն անպտուղ է լինում, ձևավորվում է ոչ ներդաշնակ ընտանեկան մթնոլորտ. «Անպտղությունը ժանգի նման քայքայում է ընտանիքը: Մեկը մյուսին է մեղադրում: Այն նպաստում է ամուսնալուծության թվի ավելացմանը»: Մասնագետը նշեց, որ անպտուղ ամուսնության դեպքում տղամարդկանց մոտ շատանում են սեռական խանգարումները. «Սովորական սեռական ակտը, որի համար հարկավոր է միայն սեռական ցանկություն, չի կարողանում իրականացնել: Պատճառը հոգեբանորեն ճնշված վիճակն է»:
Մասնագետի հաղորդմամբ՝ անպտղության հիմնական պատճառ են հանդիսանում սեռավարակները, որոնք կարող են փոխանցվել տարբեր ճանապարհներով. «Փոխանցման օբյեկտ կարող են լինել և մարմնավաճառները, և արտագնա աշխատանքը, լողավազանը, նաև անպտղություն կարող է առաջացնել արագ սնունդը և շատ նեղ հագուստը»:
Վերջում Շահրամանյանը խորհուրդ տվեց չզբաղվել «հարևանաբուժությամբ» և գոնե տարին մեկ այցելել բժշկի: