Կանաչ տարածքների բետոնապատումը դեռ շատ խնդիրներ է առաջացնելու,¸ ինչպես, օրինակ, այն, որ Երևանում վերջին շրջանում սկսել են շատանալ ագռավներն ու կաչաղակները: «Առաջին լրատվական»-ին այս մասին հայտնեց «Թռչնասերների կենտրոն» ՀԿ նախագահ Սիլվա Ադամյանը: Սրա փոխարեն ժամանակի հետ մայրաքաղաքում նվազում է երբեմնի երգեցիկ թռչունների թիվը:
Ըստ բնապահպանի` քաղաքային իշխանությունների համար պետք է որ սա զարմանալի չլինի, քանի որ բետոնապատ քաղաքում, ագռավներից բացի, մեկ էլ ճնճղուկները կկարողանան դիմանալ: Մայրաքաղաքի չափից դուրս աղտոտվածությունը մտավախություն է ստեղծում, որ մի օր Երևանը դառնալու է ագռավներով լի քաղաք, քանի որ վերջիններս ապրում են այնտեղ, որտեղ աղբը շատ է:
«Սրանք բնության սանիտարներ են, և նրանց դեմ պայքարելու միակ միջոցը պարզապես քաղաքը մաքուր պահելն է»,- ասում է «Թռչնասերների կենտրոն» ՀԿ նախագահը:
Երևանի շրջակայքում նախկինում բնակվել են 158 տեսակի երգեցիկ և գիշատիչ թռչուններ, որոնց թիվն այսօր կտրուկ նվազել է։ Մայրաքաղաքում, ճնճղուկներից և տարբեր ագռավազգիներից բացի, այսօր դեռ բնակվում են կարմրակատարը, ամուրիկը, սովորական սերինոսը, կաչաղակը և այլն:
Սակայն սոխակները, որոնք բնակվում էին քաղաքի այգիներում, այժմ Երևանից իսպառ վերացել են։ Ընդհանրապես, բնապահպաններն ահազանգում են, որ անտառային տիպի թռչունները Երևանից գնացել են, որովհետև Երևանն ամայացած է:
«Երևանի բնակիչները հաճախ բողոքում են, որ կրծողները քաղաքում շատացել են,¸իսկ դրա պատճառն այն է, որ դրանց ոչնչացնող թռչուններն այսօր պակասել են: Կենտրոնում կառուցվող էլիտար շինություններն էլ ծիծեռնակների բազմացմանն են խանգարում»,- ասում է Սիլվա Ադամյանը։
