ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ մայիսի 9-ին՝ Հաղթանակի և Խաղաղության տոնի առթիվ ՀՀ Ազգային ժողովի նախագահ Սամվել Նիկոյանը, պատգամավորներ, պաշտոնատար անձինք, բարձրաստիճան զինվորականներ, հոգևոր դասի ներկայացուցիչներ, Հայաստանում հավատարմագրված դիվանագետներ այցելել են «Մայր Հայաստան» հուշահամալիր և ծաղկեպսակներ ու ծաղիկներ դրել «Անհայտ զինվորի» շիրիմին, լռությամբ հարգել Հայրենական մեծ պատերազմում և արցախյան հերոսամարտում զոհվածների հիշատակը։
Հնչել են ՀՀ և ՌԴ պետական հիմները, որից հետո Հայաստանի և Ռուսաստանի զինվորականները տոնական քայլերթ կատարեցին։
Սամվել Նիկոյանը «Մայր Հայաստան» հուշակոթողի հարևանությամբ տեղակայված զինվորական դաշտային խոհանոցում պատերազմի վետերանների հետ ճաշակել է զինվորական ուտեստներից։ Խորհրդարանի նախագահը մտերմիկ զրույցի բռնվելով Հայրենական մեծ պատերազմի մասնակիցների հետ, գավաթ բարձրացրել ու Հաղթանակի և Խաղաղության տոնի կապակցությամբ շնորհավորանքի ու բարեմաղթանքի խոսքեր հղել նրանց։
Պարոն Նիկոյանը լրագրողների հետ ճեպազրույցում նշել է.«Մայիսը հայ ժողովրդի համար հաղթանակների ամիս է, և այսօր բոլորի ուրախության օրն է։ Մեր պատմության մեջ բազմաթիվ տարեթվեր կան, որտեղ կորուստներ ենք ունեցել, ինչից էլ` լացի ու ողբի երգեր են ծնվել։ Իսկ սա այն օրն է, երբ կարող ենք հաղթանակի երգեր հնչեցնել։ 1945 թվականի մայիսի 9-ին հայ զինվորները հաղթական քոչարի պարեցին Բեռլինիում, և մենք կարողացանք այդ քոչարին տեղափոխել Շուշի։ Հայորդիները հասկացան, որ իրենք կարող են հաղթանակի քոչարի պարել և ուրախության երգեր հնչեցնել։ Եվ դա արտահայտվեց նաև ղարաբաղյան պատերազմի ժամանակ»։
ԱԺ նախագահն այցելել է ՀՀ ՊՆ «Մայր Հայաստան» զինվորական թանգարան, որտեղ ներկայացված ցուցանմուշները, վավերագրերն ու փաստաթղթերը պատմում են երկրորդ աշխարհամարտին հայ ժողովրդի մասնակցության և 20-րդ դարի 80-90-ական թվականների արցախյան ազատամարտում հերոսացած հայորդիների մասին։ Թանգարանի ցուցադրությունների մեջ է նաև ԱԺ նախագահ Սամվել Նիկոյանի և ընկերների կողմից նախագծած ու արտադրած, արցախյան պատերազմի ընթացքում օգտագործված ականի նմուշը։ Պարոն Նիկոյանը հուզմունքով դիտել է ականը, ներկայացրել դրա ստեղծման նախապատմությունը։
Նույն օրը ՀՀ օրենսդիր իշխանության անունից ծաղկեպսակ և ծաղիկներ են դրվել Ազատության պողոտայում կանգնեցված Շուշիի ազատագրմանը նվիրված հուշարձանին։
