«Ստեփանակերտում ականատես եղանք փայլուն զորահանդեսի». այսօր լրագրողների հետ հանդիպմանը ռազմական փորձագետ Արծրուն Հովհաննիսյանը խոսեց Ստեփանակերտի այսօրվա զորահանդեսի մասին :
Նա նշեց, որ Շուշիի ազատագրության տոնը շատ կարևոր է բոլորի համար, քանի որ հային հաղթանակներ շատ են պետք: Ըստ նրա` զորահանդեսը շատ փայլուն անցավ, և Բաքվում սա ընկալվել է որպես ապտակ:
«Մեր զորահանդեսը բացառիկ էր: Մեկ ժամ առաջ Կարմիր հրապարակում մեկ այլ զորահանդես անցավ , հագնված էին տոնական համազգեստներ, իսկ մենք ունենք Պաշտպանության բանակի զինվոր, ով նոր է իջել պաշտպանական դիրքերից: Մենք ունենք փայլուն բանակ, իսկ զորահանդեսը հայոց բանակի մի գեղեցիկ մասնիկն է:
Զորահանդեսի ժամանակ ցուցադրվեց մեծաքանակ թրթուրավոր զրահատեխնիկան, հնչեցին ստորաբաժանումների անվանումներ, պաշտպանության բանակի համալրման գործընթացն արտահայտվեց որոշակի զինատեսակներով:
Մենք այսօր տեսել ենք կատարելագործված՝ նոր մոդելի թռչող սարքեր, շատ տանկային ստորաբաժանումներ դարձել են բրիգադա և այլն»,- մանրամասնեց ռազմական փորձագետը` հավելելով, որ այս զորահանդեսի արձագանքները դեռևս կհնչեն ադրբեջանական լրատվամիջոցներում:
Արծրուն Հովհաննիսյանի կարծիքով` կհնչեն հարցադրումներ՝ Պաշտպանության բանակը ե՞րբ հասցրեց այսպիսի համալրում իրականացնել. սրանք հարցեր են, որոնք Բաքվում են վերլուծելու:
