Արդեն մի քանի ամիս է քաղաքացիական հասարակությունը պայքարում է ԱՕԿՍ-ի շենքի պահպանության վրա: Ինչպես «Առաջին լրատվական»-ի հետ զրույցում տեղեկացրեց «Մեր քաղաքը» հանրային քաղաքացիական նախաձեռնության անդամ Վարդան Գերավետյանը, Երևանի քաղաքապետ Տարոն Մարգարյանի դեկտեմբերի 19-ի թույլտվության համաձայն, «Լոկալ դիվելոփրզ» ընկերությունը կարող է փոսորակ փորել ԱՕԿՍ շենքի հարևանությամբ, և ճարտարապետահատակագծային առաջադրանքի ստորագրությունը ևս տրված է Տարոն Մարգարյանի կողմից: Վարդան Գերավետյանի փաստմամբ` փոսորակը փորված է, սակայն ո՛չ շինարարության, ո՛չ քանդման աշխատանքներ իրականացնելու թույլտվություններ չկան:
Ըստ ակտիվիստի` «Լոկալ դիվելոփերզ» ընկերությունը, ի դեմս Սամվել Մայրապետյանի, նախատեսում է կառուցել 7 հարկանի հյուրանոցային համալիր, որի ճակատային մի մասը լինելու է Պուշկին փողոցի վրա, մյուս մասն ընկնելու է Աբովյան 3/1 շենքի հետնամասում մինչև Լալայանց փողոց, իսկ ԱՕՔՍ-ի շենքը Աբովյան 3-ն է: «Կառուցվելու է 7 հարկանի հյուրանոցային համալիր, բայց նախկինում խոսք է եղել նաև 12 հարկի մասին, այսինքն` չկա հաստատված նախագիծ, իսկ սա նշանակում է, որ 7-ը կարող է դառնալ 10, 15 և այլն, այսինքն` ինչպես հիմա նստել և ինչ-որ բաներ են որոշել կարող են անել նաև վաղը»,- նկատեց Վ. Գերավետյանը:
Մայիսի 5-ից տարածքում սկսել են իրականացնել քանդման աշխատանքներ. «Ես զանգահարել եմ թեժ գիծ, որից հետո ԳԱՍՔ-ից ներկայացուցիչ է եկել և արգելել քանդման աշխատանքները: Այսինքն` կատարում էին նախապատրաստական աշխատանքները, որ ամսի 7-ին փաստորեն քանդեն: Ամսի 7-ին մարդիկ ինձ զանգահարեցին 09.30-ի սահմաններում, հետո պարզվեց, որ հարվածել են ԱՕԿՍ շենքին և փլուզել շենքի մի մասը` Լալայանց փողոցի մի հատվածի հետնամասից:
Սա էր պատճառը, որ այսօր «Մեր քաղաքը» հանրային քաղաքացիական նախաձեռնությունը «ԱՕԿՍ-ի շենքն իմն է» խորագրով քաղաքացիական բողոքի ակցիա անցկացրեց այսօր՝ 13:00-14:30-ին, Աբովյան 3/1 հասցեում ԱՕԿՍ-ի շենքի հարևանությամբ:
Ակցիայի շրջանակում մասնակիցները շարժվեցին դեպի Մշակույթի նախարարություն և հանդիպում ունեցան ՀՀ մշակույթի փոխնախարար Արև Սամուելյանի հետ: «Իրավական ոչ մի փաստաթուղթ նրանք չներկայացրին մեզ, քանի որ չունեն: Արև Սամուելյանն ասաց, թե պայմանավորվածություն են ունեցել, որ հետագայում ամրագրվի, սակայն կառուցապատողը շտապել է և շուտ է քանդել»: Վարդան Գերավետյանը մանրամասնեց` հավելելով, որ ինչպես միշտ, օրենքը խախտելով, անօրինական քանդման աշխատանքներ են իրականացրել, այն դեպքում, երբ ըստ ՀՀ օրենքի՝ քանդման աշխատանքների համար պետք է համապատասխան թույլտվություն լինի, ինչն իրենք այս պահին չունեն:
«Մեր քաղաքը» հանրային քաղաքացիական նախաձեռնության անդամ Վարդան Գերավետյանը վստահեցրեց, որ իրենք պարզելու են ԱՕԿՍ շենքի հարևանությամբ նախատեսվող հյուրանոցի կառուցապատման իրավական հիմքերը: «Առաջին լրատվական»-ի հետ զրույցում երիտասարդ ճարտարապետ Սարհատ Պետրոսյանը ԱՕԿՍ շենքի հարևանությամբ տեղի ունեցող կառուցապատումը հերթական անօրինականություն որակեց:
Լուսանկարը՝ PanARMENIAN Photo-ի
