Երեկ վարչապետ Տիգրան Սարգսյանի մոտ տեղի է ունեցել խորհրդակցություն, որը նվիրված է եղել հանրապետության գյուղատնտեսության ոլորտին: Հիշեցնենք, որ սա այն ոլորտն է, որտեղ 2010 թվականի դեկտեմբերի 31-ին տեղի ունեցավ նախարարի փոփոխություն: Այսինքն` Սերժ Սարգսյանը տարվա ամենավերջին, ոչ աշխատանքային օրով իսկ փոխեց նախարար Գերասիմ Ալավերդյանին և նշանակեց նոր նախարարի` այդպիսով ընդգծելով, որ գյուղատնտեսության ոլորտը իշխանությունների համար լինելու է առանձնահատուկ կարևորության ոլորտ:
Եվ ահա, երեկ վարչապետի մոտ տեղի ունեցած խորհրդակցությանը, ի թիվս այլ հարցերի, ներկայացվել է գյուղացիական տնտեսությունների խոշորացման հայեցակարգի նախագիծը: Այստեղ էլ, ըստ երևույթին, թաղված է շան գլուխը: Թե ինչ է նշանակում գյուղացիական հողերի խոշորացում` կարելի է պատկերացնել: Դա նշանակում է գյուղատնտեսության մոնոպոլիզացիա կամ օլիգոպոլիզացիա: Այսօր թանկ վարկերի բեռի տակ կքած և իրենց օրվա հացն ապահովող գույքը կորցնելու վտանգի առաջ կանգնած գյուղացիական հարյուրավոր տնտեսություններ բացարձակապես ի զորու չեն լինելու մասնակցել հողերի խոշորացման գործընթացին և ստիպված են լինելու վաճառել իրենց հողերն ու ըստ էության որպես ճորտ աշխատել ավելի խոշոր հողատերերի մոտ: Իսկ թե ովքեր են լինելու խոշոր հողատերերը` նույնպես դժվար չէ կռահել: Դրանք լինելու են Հայաստանի տնտեսության մնացյալ բոլոր ոլորտներն իրար մեջ բաժան-բաժան արած օլիգարխները` բնականաբար իշխանության ամենավերին օղակների հետ սերտաճած:
Ահա թե ինչու է գյուղատնտեսությունը հայտնվել իշխանության ուշադրության կենտրոնում, իսկ Տիգրան Սարգսյանն էլ երեկ հայտարարել է, որ 2011 թվականի համար այն գերակա ճյուղ է: Տնտեսության ոլորտները խժռելու գործը իշխանության համար միշտ էլ եղել է գերակա խնդիր, և այստեղ զարմանալու ոչինչ չկա: Զարմանալին ընդամենը այն է, որ իշխանությունը գյուղատնտեսության հարցում այսքան ուշացել է: Թեև սա էլ զարմանալի չէ: Ի վերջո իր վերահսկողության տակ, նույն այդ օլիգարխիկ կապիտալին պատկանող բանկային համակարգի միջոցով գյուղացիներին սնանկացնելու համար ժամանակ էր պահանջվում: Հիմա, երբ գյուղացին կանգնած է իր ունեցվածքը կորցնելու վտանգի առաջ, իշխանությունը որոշել է, որ արդեն հողերը խոշորացնելու իսկական ժամանակն է, որպեսզի ավելորդ դիմադրություն չլինի:
«Ժամանակ» օրաթերթ
