«1991 թ.-ին Լեռնային Ղարաբաղում անցկացված հանրաքվեի արդյունքների ընդունումն անհնար է, քանի որ այն անցկացվել է Խորհրդային Միության օրենսդրության և միջազգային նորմերի խախտմամբ»,- ասել է Ադրբեջանի նախագահի աշխատակազմի քաղաքական վերլուծության և տեղեկատվական ապահովության բաժնի ղեկավար Էլնուր Ասլանովը: Trend-ին տված հարցազրույցում նա հայտարարել է, որ նոր հանրաքվեի անցկացումը ներկայիս պայմաններում ևս անհնար է` ադրբեջանական տարածքների «օկուպացիայի» և փախստականների առկայության պայմաններում: «Այդ խոչընդոտների վերացման դեպքում հնարավոր է անցկացնել հանրաքվե, որը չպետք է հակասի Ադրբեջանի սահմանադրությանը»,- ասել է Ասլանովը:
Սերժ Սարգսյանը օրերս эхо москвы ռադիոկայանին տված հարցազրույցում հայտարարել էր, որ հակամարտության խաղաղ կարգավորման միակ տարբերակը Արցախում հանրաքվեի անցկացումն է կամ 1991-ի հանրաքվեի արդյունքների ճանաչումը: Ասլանովի կարծիքով` Ադրբեջանը կոմպրոմիսի է գնացել, երբ հայտարարել է, որ պատրաստ է քննարկել Լեռնային Ղարաբաղի ինքնորոշման հարցը, սակայն դա չի արվի տարածքային ամբողջականության հաշվին: Ասլանովը սպառնացել է, որ եթե Հայաստանը շարունակի Արցախի անկախություն պահանջել, ապա Ադրբեջանը պետք է Հայաստանին Զանգեզուրի անկախացման պահանջ ներկայացնի, որտեղ կստեղծվի ադրբեջանական երկրորդ պետություն: