Թիվ 4/12 ընտրատարածքում քվեարկում են քաղաքացիներ՝ հիմնականում 20-25 տարեկան աղջիկներ, որոնք ապրիլին դուրս են եկել Երևանի հարակից համայնքներում գրանցումից, և ապրիլի վերջին շատ կարճ ժամանակում գրանցում ստացել Արաբկիր համայնքի սեփական տներում, որոնց բնակիչները սակայն նրանց չեն ճանաչում: 4/12 ընտրատարածքի հանձնաժողովի նախագահ Ռուզաննա Խաչիկյանն «Առաջին լրատվական»-ին հայտնեց, որ բացահայտել է կասկածելի գրանցում ունեցող բազմաթիվ քաղաքացիների, սակայն իրավունք չունեն թույլ չտալ մասնակցելու քվեարկությանը, քանի որ ընտրողների ցուցակները հաստատված են ոստիկանության անձնագրային վարչության կողմից:
«Մեր խնդիրը չի, վստահված անձինք իրավունք ունեն ֆիքսել, սակայն մնացածը համապատասխան կառույցները պետք է զբաղվեն»,- ասաց Ռ. Խաչիկյանը:
Ընտրատարածքում մեր գտնվելու ընթացքում քվեարկությանը մասնակցեց հենց նման գրանցում ունեցող մի քաղաքացի՝ Ավագյան Սոնա Կարապետի, ով չգիտեր իր հասցեն և չգիտեր տանտիրոջ անունը, որտեղ գրանցված է: Ընդ որում, հանձնաժողովի անդամը, ով գրանցում էր աղջկան, փորձեց ընդդիմանալ, որ «Ժառանգություն» կուսակցության վստահված անձը գրանցի նրա տվյալները, և ինքն էր պատասխանում հարցերին, թե ում տանն է գրանցված քաղաքացին: Վերջինս հրաժարվեց պատասխանել նաև մեր հարցերին: Անձնագրի տվյալները գրանցելուց հետո նա քվեարկեց:
Ընտրատեղամասում ՀԱԿ-ի վստահված անձ Սվետլանա Հարությունյանը մեզ հայտնեց, որ նման կասկածելի գրանցում ունեցող քաղաքացիներին հաշվառում են, որ հետո պարզեն իրողությունը, իսկ առայժմ իրավական ոչ մի հիմք չունեն արգելելու նրանց մասնակցությունն ընտրության գործընթացին:
«Ժառանգություն» կուսակցության վստահված անձը տեղեկացրեց, որ հանձնաժողովի տվյալ անդամը նախորդ կասկածելի դեպքերի ժամանակ էլ է ընդդիմացել իրենց և փորձել է թույլ չտալ վերցնել անձնագրային տվյալները: Դիտորդները դիմեցին ոստիկաններին, սակայն նրանք չմիջամտեցին քվեարկությանը՝ պատճառաբանելով, որ դրա համար հանձնաժողովի նախագահը պետք է դիմի իրենց: