Երբ «Առաջին լրատվական»-ի լրագրողը մտավ 7/09 տեղամաս, մինչ մեր մուտքի փաստը կարձանագրեին համապատասխան գրանցամատյանում, նկատեցինք, որ տեղամասում առկա երեք քվեախցիկներից երկուսի մոտ երկուական քաղաքացիներ էին կանգնած: Հանձնաժողովի նախագահ Վլադիմիր Մեսրոպյանի ուշադրությունը հրավիրեցինք այդ հանգամանքին. հանձնաժողովի նախագահը հարցրեց. «Դուք արդեն քվերակե՞լ եք: Ձեզ օգնող պե՞տք է»: Պարզվեց նրանցից մեկին օգնում էին` տեսողական խնդիր ունենալու պատճառով, իսկ մյուսը` անմիջապես կանգնած էր քվեախցիկի կողքին` սպասում էր:
Վ. Մեսրոպյանը մեր հարցերին ի պատասխան` ասաց, որ թիվ 7/09 ընտրատեղամասում ըստ ցուցակի` 1798 ընտրող կա, և ժամը 12.00-ի սահմաններում քվեարկողների թիվը մի փոքր անցել էր 300-ից: Հարցրեցինք՝ ընտրախախտում, ընտրախախտման ինչ-որ փորձ եղե՞լ է: «Առայժմ չի գրանցվել»,-նշեց հանձնաժողովի նախագահը: Իսկ ընտրական գործընթացի հետ կապված որևէ խնդիր ծագե՞լ է, որևէ արձանագրություն կազմվե՞լ է որևէ խնդրի շուրջ: «Փոքրիկ մի արձանագրություն, բայց դա կարծիք որպես. կասկածյալ մի պահ կար, որ կնոջ մոտ նոր անձնագրի տեսքով ինչ-որ մի բան է ներկայացվել. 10 տարվա անձնագիրը, շատ թարմ վիճակում, դրա համար արձանագրեցինք»,- նշեց Վ. Մեսրոպյանը:
Սամվել Ալեքսանյանի վստահված անձը որևէ խախտում չէր արձանագրել. «Ոչ մի խախտում, ոչ մի բան, սաղ նորմալ ընթանում ա»: Անձնագրի հետ կապված խնդիր նկատել ե՞ք` հաջորդ հարցն էր: «Հա մի հատ դեպք եղավ, գրանցեցին, էդքան բան»: ՀԱԿ ներկայացուցիչը ավելի մանրամասնեց. «Դե պասպորտներ կային որոշ, որ շուտ էին տված, բայց թարմ էին, թուղթը թարմ էր շատ… Ու խմբաքանակներով: Գալիս են` քվեարկում են մարդիկ, նորմալ, հերթականությամբ, տարբեր թվականներին տված անձնագրերով ու գալիս ա, ասենք, մի հինգ հոգի, որոնց անձնագրերը բոլորինը նոր տրված է. եթե նոր էլ տրված չի, հին տրված ա, բայց նոր ա անձնագիրը: Արձանագրություն կազմվել ա»,- ասաց Նիկոլ Փաշինյանի վստահված անձ Հրաչյա Հակոբյանը:
Այս տեղամասում լրացուցիչ ընտրացուցակում ընդգրկվածները 4-ն են, և առայժմ 2-3 ընտրող է եղել, որոնց օգնել են քվեարկել՝ տեսողության և քվեարկելու այլ դժվարություն ունենալու պատճառով, որոնք, հանձնաժողովի նախագահի պնդմամբ, համապատասխան կարգով գրանցվել են:
