Եմենի մայրաքաղաք Սանա’այում տեղի են ունենում բողոքի ակցիաներ, որին մասնակցում են մի քանի հազար մարդ: Այս մասին հաղորդում է BBC հեռուստաընկերությունը: Հավաքվածները պահանջում են երկրում արդեն 30 տարի իշխող Ալի Աբդալլահ Սալեհի հրաժարականը:
Հանրահավաքներն անցնում են քաղաքի տարբեր մասերում, այդ թվում և Սանայի համալսարանի մոտ: Բոլորը ոգևորված հիշեցնում են Թունիսի օրինակը, երբ ժողովրդին հաջողվեց երկրից քշել Թունիսի արդեն նախկին նախագահ Զինա բեն Ալիին:
Թունիսի օրինակով, այսօրվա բողոքի ակցիաները սկսվել են այն բանից հետո, երբ նախօրեին 25-ամյա մի երիտասարդ ինքնահրկիզվել է: Երիտասարդը մինչ այդ տեղեկացրել էր, որ այդ քայլին է գնում, քանի որ չի կարողանում ընտանիք պահել այն գումարներով, որը նա ստանում է տաքսիստ աշխատելու ժամանակ:
Հիշեցնենք, որ արաբական երկրներում բողոքների այս շղթան սկսվել է Ալժիրից, որին հետևել են Թունիսը, Եգիպտոսը, Եմենը: Բողոքի ցույցեր են եղել նաև Հորդանանում: