Տերյան 56, Աղայան 19 եւ Նիկոլ Աղբալյան դպրոցի հարեւանությամբ գտնվող 6 հարկանի էլիտար շենքը, որը պատկանում է Աղվան Հովսեփյանի խնամուն` «Նուշիկյան ասոցիացիայի» տնօրեններից Գարիկ Նուշիկյանին, ըստ Հանրային խորհրդի նախագահ Վազգեն Մանուկյանի, ենթակա է քանդման: Սակայն այս օբյեկտիվ որոշման մեջ զավեշտը կայանում է նրանում, որ Վազգեն Մանուկյանը այդ առաջարկը ներկայացրել է ոչ թե Սերժ Սարգսյանին, այլ Տերյան 56 եւ Աղայան 19 շենքերի բնակիչներին: Հիշեցենք, որ 516 քառ.մ հողակտորը կառուցապատման նպատակով պարսպապատվել է 2006-ի դեկտեմբերին, սակայն բուն գործընթացը սկսել է 2000թ.-ին` Ալբերտ Բազեյանի օրոք: Բնակիչները դիմել են մի շարք պետական ատյաններ, որշ ժամանկ հաջողվել է կասեցնել շինարարությունը, սակայն երբ Աղվան Հովսեփյանի որդին ամուսնացել է Գարիկ Նուշիկյանի դստեր հետ, շենքը վերջնականպես կառուցվել է: Իսկ նորապսակները դարձել են նորակառույց շենքի առաջին բնակիչները: Վերը նշված հասցեների բնակիչները դեռեւս շարունակում են իրենց պայքարը՝ նպատակ ունենալով շենքը մասնակի քանդել: Հերթական դիմում բողոքներից հետո նրանք ստացել են Հանրային խորհրդի նախագահ Վազգեն Մանուկյանի պատասխանը, որում առաջարկվում է միջոցներ ձեռնարկել վիճարկվող կառույցը քանդելու համար: «Այդ առաջարկությունը, համաձայն ՀԽ հիմնադիր փաստաթղթերի, պետք է ներկայացվեր Սերժ Սարգսյանին, այլ ոչ թե մեզ: Քանդման ենթակա էլիտար շենքը այնքան էլ փոքր չէ: Հետեւաբար դիմել ենք Սերժ Սարգսյաին՝ խնդրելով հանձնարարել համապատասխան պետական մարմիններին աջակցելու մեզ վիճարկվող շենքը քանդելու պատմական գործում, այդ թվում, տրամադրել անհրաժեշտ տեխնիկա»,- մեզ հետ զրույցում նշեց Տերյան 56 եւ Աղայան 19 շենքերի բնակիչների իրավունքների պաշտպանության հանձնախմբի համակարգող Ռուբեն Թորոսյանը եւ ավելացրեց, որ պատասխան ստանալուց հետո խմբագրությանը կտեղեկացնենք խնամի-նուշիկյանների էլիտար շենքի քանդման ժամանակի եւ այլ մանրամասների մասին: