ԱՄՆ-ի պետական բյուջեի (ֆեդերալ բյուջեի) դեֆիցիտը 2011թ. կհասնի 1.5 տրլն դոլարի` կազմելով ՀՆԱ-ի 9.8%-ը, եթե փոփոխություններ չմտցվեն այս ոլորտի օրենսդրության մեջ: Այսպիսի կանխատեսում է արել ԱՄՆ-ի կոնգրեսի բյուջետային բյուրոն, որի խնդիրն է ճիշտ ժամանակին կոնգրեսին ներկայացնել օբյեկտիվ և անկախ տեղեկատվություն` օգնելու համար բյուջեի հետ կապված ոլորումների ընդունմանը: Հաշվետվության մեջ նշվում է, որ բյուջեի դեֆիցիտի 2009թ-ի (1.4 տրլն դոլար կամ ՀՆԱ 10%) և 2010թ. (1.3 տրլն դոլար կամ ՀՆԱ 8.9%) ցուցանիշները ամենաբարձրն են 1945 թվականից սկսած: Նշենք, որ սովորաբար համարվում է, որ բյուջեի դեֆիցիտ/ՀՆԱ հարաբերակցության օպտիմալ չափը չպետք է գերազանցի 3%-ը:
ԱՄՆ կոնգրեսի բյուջետային բյուրոյի գնահատականներով` առաջիկա մի քանի տարիներին արտադրության ու զբաղվածության մակարդակը ցածր կլինի ԱՄՆ տնտեսության պոտենցիալից: Կանխատեսումների համաձայն` երկրի ՀՆԱ-ն առաջիկա 2 տարիներին կաճի համապատասխանաբար 3.1%-ով (2011թ.) և 2.8%-ով (2012թ.), իսկ գնաճը կմնա ցածր մակարդակի վրա` տնտեսության մեջ մեծ ծավալի չօգտագործվող ռեսուրսների պատճառով: Գործազրկության մակարդակը աստիճանաբար կսկսի նվազել` մինչև 9.2% 2011թ. չորրորդ եռամսյակում, մինչև 8.2%` 2012թ. չորրորդ եռամսյակում և մինչև 7.4%` 2013 թ. վերջին: Սակայն գործազրկությունն իր բնական մակարդակին` 5.3%-ին, կհասնի միայն 2016թ.: Բյուրոն նաև կանխատեսում է, որ ԱՄՆ-ի ֆեդերալ բյուջեի դեֆիցիտը հաջորդող տարիներին կկրճատվի` կազմելով 1.1 տրլն դոլար (ՀՆԱ 7%-ը) 2012թ., 704 մլրդ դոլար (ՀՆԱ 4.4%)` 2013թ. և 533 մլրդ դոլար (ՀՆԱ 3.1%)
2014թ.: