20th Century Fox ընկերությունը որոշում է կայացրել Ֆլորիդայից սևամորթ դեռահաս պատանու սպանության պատճառով փոխել Բեն Սթիլերի մասնակցությամբ նոր ֆիլմի անվանումը: Այս մասին հաղորդում է Reuters գործակալությունը:
«Հասարակական պարեկ» անվանման փոխարեն, ինչպես մայիսի 4-ին հայտնել են կինոստուդիայի ներկայացուցիչները, Բեն Սթիլերի մասնակցությամբ ֆիլմը կկոչվի «Պարեկը»: Հյուսիսային Ամերիկայում ժապավենը վարձույթ դուրս կգա 2012թ. հուլիսի վերջին:
«Չնայած այն բանին, որ այլմոլորակայինների մասին կատակերգության սյուժեն ոչ մի առնչություն չունի Ֆլորիդայում կատարված իրադարձությունների հետ, ստուդիան որոշում է կայացրել փոխել ֆիլմի անվանումը` խուսափելու ցանկացած պատահականությունից»,- ասվում է 20th Century Fox-ի տարածած հայտարարության մեջ:
Հիշեցնենք, որ 2012թ. Ֆլորիդա նահանգի Սենֆորդ քաղաքում հասարակական պարեկ Ջորջ Ցիմերմանը կրակել էր անզեն սևամորթ դեռահասի` Թրեյվոն Մարտինի վրա, քանի որ նրա գործողությունները պարեկին կասկածելի էին թվացել: Նրանց միջև վիճաբանություն էր ծագել, որի արդյունքում Ցիմերմանն ատրճանակով կրակել էր Մարտինի վրա` հետագայում հայտարարելով, որ նման քայլի գնացել է ինքնապաշտպանությունից դրդված:
Մարտինի հարազատները գտնում են, որ Ցիմերմանի գործողությունների հիմքում ռասայական խտրականությունն է:
Ապրիլի 11-ին Ցիմերմանին ներկայացվել էր երկրորդ աստիճանի սպանության մեղադրանք: Հանդես գալով դատարանի առաջ` Ցիմերմանը հայտարարել էր իր անմեղության մասին, որից հետո կալանքից ազատ էր արձակվել՝ 150 հազար դոլար գրավի դիմաց:
