«Թրանսփարենսի ինթերնեշնլ» հասարակական կազմակերպության հայաստանյան գրասենյակի տնօրեն Վարուժան Հոկտանյանից հետաքրքրվեցինք, թե ըստ «ԹԻ»-ի դիտարկումների` ինչպես է հայ հանրությունը վերաբերվում կոռուպցիային: Վարուժան Հոկտանյանը նշեց, որ 2006 թ. կազմակերպությունն անց է կացրել ուսումնասիրություն` պարզելու կոռուպցիայի ընկալումը Հայաստանում: Դրանից հետո, ըստ Հոկտանյանի, լավ ուսումնասիրություններ է կատարել նաեւ Կովկասյան ռեսուրսների հետազոտական կենտրոնը: Եվ ուսումնասիրություններից ելնելով էլ պարզվել է, որ Հայաստանում առկա է կոռուպցիայի նկատմամբ բավականին հանդուրժողական վերաբերմունք: «Մարդիկ փորձում են կաշառքով լուծել իրենց խնդիրները, քանի որ այլ ելք չեն տեսնում: Այս առումով Հայաստանը շատ չի տարբերվում հետխորհրդային մյուս երկրներից», -«1in.am»-ին ասաց Վարուժան Հոկտանյանը: Տարածաշրջանում այլ է պատկերը, օրինակ՝ Վրաստանում: Վարուժան Հոկտանյանի դիտարկմամբ, այնտեղ թեեւ տեղի են ունեցել բարեփոխումներ վերեւից, սակայն Վրաստանը եւս նահանջ է գրանցել: Վարուժան Հոկտանյանին հարցրինք, թե արդյոք մեր հասարակությունը հասել է այն մակարդակին, որ վերեւից իրականացվող բարեփոխումներն օգնեն կոռուպցիայի նվազմանը: «Կարծում եմ` եթե քաղաքական կամք դրսեւորվի եւ պայքար ծավալվի կոռուպցիայի դեմ, դա բավականին դրական արձագանք կգտնի: Մարդիկ սիրահոժար չեն կաշառք տալիս, այլ ստիպված են»,- ասաց մեր զրուցակիցը: «ԹԻ» ՀԿ տվյալներով, այս տարի Հայաստանը հետ է մնում ոչ միայն Վրաստանից, այլեւ Ղազախստանից եւ Մոլդովայից:
