ԱՄՆ Պետդեպարտամենտն այսօր հայտարարել է ամբողջ աշխարհում ուսանողների շրջանում հայտնի «Աշխատիր և ճանապարհորդիր» ամերիկյան ծրագրում փոփոխություններ մտցնելու մասին, քանի որ այն իրականացվում էր բազմաթիվ խախտումներով: Ինչպես պարզվել է, մի շարք ուսանողներ, ովքեր ամառային արձակուրդներին այդ ծրագրով մեկնում էին ԱՄՆ, հայտնվում էին «անբարենպաստ պայմաններում»: Մասնավոր գործատուները, ովքեր Պետդեպարտամենտի հետ համաձայնության շրջանակներում պարտավոր էին երիտասարդներին կացարանով և աշխատանքով ապահովել, փորձում էին ոչ միայն խստորեն տնտեսել իրենց միջոցները, այլ նաև երբեմն հյուրերին ստիպում էին կատարել կասկածելի գործեր:
Associated Press լրատվական գործակալությունն ավելի վաղ հաղորդել էր, որ մի շարք երիտասարդների«ծանր աշխատանքների» են ուղարկել, իսկ աղջիկներին ստիպել են աշխատել ստրիպտիզ-ակումբներում:
ԱՄՆ Պետդեպարտամենտը հայտարարել է, որ այսուհետ թույլ չի տա նման խախտումներ և կուժեղացնի այդ ծրագրի իրականացման վերահսկողությունը, որն ուղղված է ազգերի միջև «մշակութային փոխըմբռնման զարգացմանը»: Մասնավորապես, արտասահմանյան ուսանողների համար, որոնք ամառային արձակուրդներին ժամանում են ԱՄՆ, աշխատանքի հետ կապված՝ խիստ սահմանափակումներ կան:
Ամեն տարի «Աշխատիր և ճանապարհորդիր» ծրագրով ԱՄՆ է ժամանում ավելի քան 100 հազար ուսանող` տասնյակ քաղաքներից: