Նախընտրական քարոզարշավի վերջին օրը «Բարգավաճ Հայաստան» կուսակցությունը հանդիպել է Շիրակի մարզի ընտրողների հետ: ԲՀԿ առաջնորդ Ծառուկյանը եղել է Ազատանում, Ամասիայում, Աշոցքում և ընտրողների հետ հանդիպումը եզրափակել Գյումրիում:
Թիվ 34 ընտրատարածքում առաջադրված ԲՀԿ-ական թեկնածու Մարտուն Գրիգորյանի մամուլի պատասխանատու Աղասի Աբրահամյանն «Առաջին լրատվական»-ի հետ զրույցում, խոսելով ԲՀԿ-ի քարոզարշավի մասին, նախ շեշտեց. «Եղանակը լավն էր, երկու օր խայտառակ անձրև ու տոռնադո էր: Իր գալուց մի ժամ առաջ խաղաղվեց: Եկել էին մարդիկ, ինքն էլ շատ չխոսեց, չհոգնեցրեց»: Հիշեցնենք, որ երեկ Մատենադարանի հարակից տարածքում հանրահավաքի ժամանակ տեղացած հորդառատ անձրևի պատճառով ԲՀԿ-ի հանրահավաքը շատ կարճ տևեց: Ա. Աբրահամյանի փոխանցմամբ՝ Ծառուկյանն ընտրողներին կոչ է արել ձայն տալ ԲՀԿ-ական թեկնածուներ Մարտուն Գրիգորյանին և Սամվել Բալասանյանին:
Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը «Առաջին լրատվական»-ի հետ զրույցում թիվ 34 ընտրատարածքում սպասվող ընտրապայքարի վերաբերյալ ասաց, որ և՛ ՀՀԿ-ի, և՛ ԲՀԿ-ի թեկնածուն բավական միջոցներ են ծախսում գովազդի, քարոզչության համար, և ակնկալվում է, որ այս ընտրատարածքում շատ խիստ մրցակցություն է լինելու: «Խիստ ուժեղ մրցակցություն է ընթանում, որևէ հետազոտություն չունենք արած, բայց քաղաքի տրամադրություններն այդ իմաստով խիստ մրցակցային են, հույս ունեմ ընտրությունների օրը որևէ բախում չի լինի»,- ասաց նա:
Հարցին, թե քաղաքապետ Վարդան Ղուկասյանի դստեր փեսացուի սպանությունն ինչպե՞ս անդրադարձավ թեկնածուների վարկանիշի վրա և ինչպիսի՞ն է այսօր մթնոլորտը Գյումրիում, նա պատասխանեց. «Իմ խորը համոզմամբ, դա քաղաքականության հետ կապված սպանություն չէր: Թեկնածուների վարկանիշի վրա դա չազդեց, գուցե մեկ-երկու օր ինչ-ինչ տրամադրություններ փորձեցին ձևավորել քաղաքում, բայց դա երկարաժամկետ ազդեցություն չունեցավ»:
Լ. Բարսեղյանն ասաց նաև, թե չի կարծում, որ մեծ թվով ոստիկաններ կբերեն Գյումրի. «Օրինակ՝ տեղական ինքնակառավարման մարմինների ընտրության ժամանակ մի 40 ավտո ոստիկան էին բերել, բայց դա համապետական ընտրություն չէր, և ռեսուրսները քիչ թե շատ ազատ էին, բայց մեկ էլ տեսաք՝ այս անգամ էլ բերեցին, ո՞վ գիտե»:
