Սիրիայում ՄԱԿ դիտորդական նոր առաքելության ղեկավար գեներալ-մայոր Ռոբերտ Մուդը հաղորդել է, որ Սիրիա շարունակում են ժամանել խաղաղապահներ՝ աշխարհի տարբեր ծայրերից: Ինչպես հաղորդում է MIGnews-ը, Մուդը նշել է, որ նրանց գլխավոր խնդիրը կրակը դադարեցնելուն հետևելն է և Քոֆի Անանի ծրագրի իրականացումը, սակայն վստահ է, որ 10, 30 և անգամ 300 ու ավել դիտորդները չեն կարող լուծել բոլոր խնդիրները:
«Որպեսզի Սիրիայի ժողովուրդն առաջ շարժվի, պետք է ընդգրկել սիրիական հասարակության բոլոր շերտերը, ինչպես նաև միջազգային հանրությանը՝ թե՛ Սիրիայում, թե՛ Սիրիայի սահմաններից դուրս»,- կարծում է Մուդը:
Միաժամանակ նա հավելել է, որ խաղաղապահներն իրենց հյուր են համարում և ակնկալում են սիրիական ավանդական հյուրընկալություն:
Ավելի վաղ ՄԱԿ դիտորդները հայտարարել էին, որ Սիրիայում հակամարտության երկու կողմերը հրաժարվում են իրականացնել խաղաղ կարգավորման ծրագիրը և խախտում են հրադադարի պայմանները:
