Կալիֆոռնիա նահանգում հանցագործը, որը գողացել էր դրամարկղը, չի կարողացել իր հետ տանել իր «որսին» և շպրտել է այն` չտանելով անգամ հարյուր մետր: Միջադեպը տեղի է ունեցել մայիսի 2-ին։ Այս մասին հաղորդում է The Monterey County Herald-ը:
Ոստիկանության տեղեկություններով՝ չորեքշաբթի օրը չինական ռեստորան է մտել 24-ամյա Ռոբերտ Բեննեթը: Նա մոտեցել է վաճառասեղանին, ինչ-որ բան է հարցրել աշխատակցին, որից հետո հայտարարել է, որ իր գրպանում կա ատրճանակ և գանձապահին սպառնացել է իրեն տալ գումարը: Սակայն աշխատակիցը կորցրել է իրեն և տեղում քարացել:
Ապա հանցագործը վերցրել է դրամարկղը (հրատարակությունը նշում է, որ դրամարկղի քաշը 20 կգ է), դուրս է վազել ռեստորանից և փորձել թաքնվել դեպքի վայրից: Սակայն դրամարկղը երիտասարդի համար չափազանց ծանր է եղել, և նա այն շպրտել է փողոցում: Դրանից հետո նա դրամարկղից վերցրել է մոտ 200 դոլար և փախել:
Շուտով կատարվածին արձագանքել է ոստիկանությունը: Իրավապահ մարմնի աշխատակիցները տեսել են փողոցով վազողին, ով սկսել է գրպանից դուրս նետել փողերը՝ այդ կերպ փորձելով ձերբազատվել իր մեղքի ապացույցներից: Որոշ ժամանակ անց նա ձերբակալվել է: Դրամարկղը և գումարը վերադարձրել են չինական ռեստորանին:
Ռոբերտ Բեննեթին մեղադրանք է առաջադրվել գողության, հանցագործության զոհերին վախեցնելու, ապացույցները ոչնչացնելու փորձի և ձերբակալմանն ընդդիմանալու համար: Թե դատարանը երբ կքննի նրա «անհաջող» հանցագործության գործը, դեռ հայտնի չէ: