Գերմանիայի բունդեսթագի «Ձախերի» խմբակցության ղեկավար Գրեգոր Գիզին կոչ է արել ընդդիմադիր կուսակցություններին միավորվել հանուն հարուստների վրա գույքահարկ մտցնելու, գրում է Hamburger Abendblatt-ը: Նման առաջարկով նա նամակ է հղել սոցիալ-դեմոկրատների և «Կանաչների» կուսակցություններին: Ընդդիմությունը պատրաստվում է նախքան ամառային արձակուրդը համապատասխան օրինագիծ մտցնել բունդեսթագ:
Որպես հիմք՝ Գիզին առաջարկում է ընդունել «Շքեղության հարկ, հիմա՛» նախաձեռնության նախագիծը: Դրա աջակցությամբ համացանցում հանդես է եկել արդեն մոտ 29 հազար քաղաքացի: Դրանց թվում են նաև տարբեր կուսակցություններից հայտնի քաղաքական գործիչներ: Նախաձեռնության կազմակերպիչներն առաջարկում են 1 տոկոս հարկ սահմանել 500 հազար եվրոն գերազանցող գույքի վրա: Այդ ճանապարհով գանձարանը կարող է ստանալ տարեկան մոտ 20 մլրդ լրացուցիչ գումար:
Գիզիի խոսքերով՝ ընդդիմադիր կուսակցությունների միջև տարաձայնությունները չպետք է խանգարեն իրենց հասնել հարուստների դեմ հարկ սահմանելուն: Նա ընդգծել է, որ հարուստ գերմանացիները նման ձևով կարող են ֆինանսավորել կրթության, գիտության, բժշկության, ինչպես նաև երկրում իրավապահ մարմիների աշխատանքների զարգացմանը:
Սոցիոլոգների տվյալներով՝ նման հարկ մտցնելու օգտին հանդես են գալիս գերմանացիների 77 տոկոսը: Այս պահին ընդդիմությունը չի կարող անցկացնել այդ օրինագիծը առանց իշխող կոալիցիայի աջակցության, ուստի քաղաքական գործիչները որոշել են դա դարձնել 2013թ. խորհրդարանական ընտրությունների քարոզարշավի գլխավոր թեման:
