Միթ Ռոմնին` ԱՄՆ նախագահական ընտրություններում ներկայիս նախագահ Բարաք Օբամայի հավանական մրցակիցը, Սպիտակ տան գործողությունները` կապված կույր այլախոհ Չեն Գուանչենի հետ, որը ԶԼՄ-ների հետ զրույցում հայտարարել էր, թե իրեն Պեկինում գտնվող ամերիկյան դեսպանատանը համարյա ստիպել են լքել դեսպանատան տարածքը, որակել է որպես «ամոթալի»:
«Եթե այդ հաղորդագրությունները ճիշտ են, ուրեմն դա ազատության համար սև օր է: Դա ամոթալի օր է Օբամայի ադմինիստրացիայի համար»,- Մասսաչուսեթսի նախկին նահանգապետի խոսքերն է մեջբերում Reuters գործակալությունը:
Հինգշաբթի Չեն Գունանչենը, որը գտնվում էր պեկինյան հիվանդանոցներից մեկում, մտավախություն էր հայտնել իր բարեկամների կյանքի համար:
«Ես հիասթափված եմ ամերիկյան դեսպանատան աշխատակիցներից: Նրանք ինձ հասկացրել են, որ պետք է լքել դիվանագիտական ներկայացուցչության շենքը: Խոստացել են ինձ հետ լինել հիվանդանոցում, սակայն արագ անհետացել են»,- CNN-ի հետ զրույցում ասել է չինացի այլախոհը:
Հիշեցնենք, որ ապրիլի վերջին Չենը փախել էր Շանդուն նահանգի իր տնից, որտեղ գտնվում էր տնային կալանքի տակ: Դրանից հետո ձերբակալվել էին նրա եղբայրը և հորեղբորորդին: Չենը տնային կալանքի էր ենթարկվել 2010 թ. այլախոհական գործունեության համար:
Սպիտակ տունը լռություն է պահպանում չինացի իրավապաշտպանի հետագա ճակատագրի վերաբերյալ: