Մայիսի 1-ին Սիեթլում բողոքի ցույցի մասնակիցները անկարգություններ են հրահրել այն շրջանում, որտեղ տեղակայված են խանութները: Այս մասին հաղորդում է Los Angeles Times պարբերականը:
Reuters գործակալության տվյալներով` խոսքը «Գրավիր Ուոլ Սթրիթը» շարժման մասնակիցների մասին է, որոնք կոտրել են խանութների ցուցափեղկերն ու ներկել ավտոմեքենաները:
Քաղաքապետ Մայք Մակգինը, կապված տեղի ունեցածի հետ, ստորագրել է հատուկ հրամանագիր, որով ոստիկաններին իրավունք է տալիս մասնակիցներից խլել իրեր, որոնք կարող էին օգտագործվել գույք փչացնելու համար (մուրճեր, ձողեր ու նմանատիպ այլ իրեր): Կալանավորվել է նվազագույնը 8 մարդ:
Մայիսի 1-ին բողոքի ցույցեր են անցկացվել նաև ԱՄՆ-ի մյուս քաղաքներում:
Ինչպես հայտնում է Associated Press գործակալությունը, Օքլենդում ոստիկանությունը ցուցարարներին քշելու համար օգտագործել է արցունքաբեր գազ, ձերբակալվել էր 23 մարդ:
«Գրավիր Ուոլ Սթրիթը» շարժումը սկիզբ է առել Նյու Յորքում 2011 թ. սեպտեմբերի 17-ին ու տարածվել երկրի մի քանի խոշոր քաղաքներում ու Եվրոպայում:
Շարժման մասնակիցները պահանջում են հարուստների համար սահմանել մեծ հարկատեսակներ, հանդես են գալիս գործազրկության ու ֆինանսական ինստիտուտների գործունեության դեմ` այն բնորոշելով որպես «ֆինանսական ահաբեկչություն»:
