Հավաքական անվտանգության պայմանագրի կազմակերպության (ՀԱՊԿ) անդամ երկրների պաշտպանության նախարարներն այսօր Աստանայում կքննարկեն օպերատիվ արձագանքման հավաքական ուժերը (ՕԱՀՈւ) ժամանակակից զինատեսակով համալրելու ու կազմակերպության ներսում ռազմատեխնիկական համագործակցությունը խորացնող հարցերի շրջանակ: Այս մասին, ինչպես հայտնում է RIA Novosti գործակալությունը, լրագրողներին հայտարարել է ՀԱՊԿ մամլո քարտուղար Վլադիմիր Զայնետդինովը:
Պաշտպանության նախարարների խորհրդի նիստը Աստանայում գլխավորում է Ղազախստանի պաշտպանության նախարար Ադիլբեկ Ջակսիբեկովը:
Նիստի ընթացքում զեկուցմամբ հանդես կգա ՀԱՊԿ գլխավոր քարտուղար Նիկոլայ Բորդյուժան: Ինչպես ենթադրվում է, Հայաստանի պաշտպանության նախարար Սեյրան Օհանյանը հանդիպման մասնակիցներին կտեղեկացնի սեպտեմբերին նախատեսված «Փոխգործակցություն-2012» համատեղ զորավարժությունների մասին:
Միջոցառման ավարտին ՀԱՊԿ անդամ պետությունների պաշտպանության նախարարները կմասնակցեն KADEX-2012 սպառազինության ու ռազմական տեխնիկայի միջազգային ցուցադրությանը:
Օպերատիվ արձագանքման հավաքական ուժերի ձևավորման մասին ՀԱԿՊ անդամ երկրները պայմանավորվել էին 2009 թ. փետրվարին, իսկ համապատասխան համաձայնագիրը ստորագրվել էր նույն թվականի հունիսի 14-ին:
ՀԱՊԿ-ի մեջ են մտնում Հայաստանը, Բելառուսը, Ղազախստանը, Ղրղզըստանը, Ռուսաստանը, Տաջիկստանն ու Ուզբեկստանը:
