Տարեսկզբին հայաստանյան երեք կուսակցություն՝ «Ժառանգությունը», «Օրինաց երկիրը» և «Հանրապետականը», դարձան Եվրոպայի ժողովրդական կուսակցության անդամ: Ընտրությունների նախօրյակին Եվրոպական խորհրդարանում ԵԺԿ խմբակցության փոխնախագահ Խայմե Մայոր Օրեխան Հայաստանում էր: Այցի նպատակն էր հանդիպել ԵԺԿ անդամ հայաստանյան կուսակցությունների հետ և ծանոթանալ նախընտրական տրամադրություններին:
«Ժառանգություն» կուսակցության նախընտրական շտաբի կազմակերպած ընդունելության ժամանակ Օրեխան պատասխանեց «Առաջին լրատվական»-ի հարցերին:
– Եվրոպական կառույցների կողմից շատ են Հայաստանի իշխանություններին ուղղված կոչերը՝ առաջիկա ընտրություններն ազատ, արդար և թափանցիկ անցկացնելու վերաբերյալ: Եթե ընտրությունների ընթացքը չլինի այդպիսին, և այն դուր չգա եվրոպական կառույցներին, ապա դա ի՞նչ ազդեցություն կարող է ունենալ Հայաստանի արտաքին հեղինակության վրա:
– Հայաստանի հեղինակությունն ավելի շատ կապած է ոչ թե ընտրությունների արդյուքների և այս կամ այն կուսակցության՝ խորհրդարանում զբաղեցրած տեղերի հետ, այլ դա ավելի ընդհանրական գործոն է և կախված է Հայաստանում ժողովրդավարության հաստատման ուղղությամբ ձեռնարկված քայլերից: Հայաստանն ունի պատմականորեն եկած ժողովրդավարության հիմքեր, պարզապես պետք է ամեն օր քայլեր ձեռնարկել դրանց հաստատման ուղղությամբ, և հույս ունենք, որ Հայաստանն այդ մոտեցմամբ կառաջնորդվի: Իսկ ժողովրդավարության հաստատումը տեղի կունենա մի շարք բարեփոխումների արդյունքում՝ կոռուպցիայի դեմ պայքար, պայքար օլոգոպոլիաների դեմ:
– Իսկ Հայաստանի ԵՄ լիիրավ անդամ դառնալու հավանականությունն ինչպե՞ս կգնահատեք:
– Իմ խորին համոզմամբ՝ Հայաստանը շատ հեշտ կարող է դառնալ ԵՄ լիիրավ անդամ, և կարծում եմ՝ որևէ պատճառ չկա, որպեսզի այդ գործընթացը տեղի չունենա: Պարզապես հաշվի առնելով այն հանգամանքը, որ ԵՄ-ն որոշակի արժեքային համակարգ կրող մի համայնք է, Հայաստանը ևս պետք է հաշվի առնի դրանք և իր մեջ կրի այդ արժեքները: Հայաստանի՝ ԵՄ անդամ դառնալու հնարավորությունը պայմանավորված է որոշակի գործոններով՝ համագործակցության և երկխոսության ձևավորմամբ, համբերատարությամբ, անհրաժեշտ քայլերի և համապատասխան միջոցների ձեռնարկմամբ:
