Ա.Գեղամյանն առանձին հոդվածով, որը տպագրվել է Regnum գործակալության կայքում, անդրադարձել է Ռուսաստանի մասնատման արևմտյան «դավադրությանը»` հիշելով նաև հայ-ռուսական «դարավոր բարեկամությունը»: Ձեզ ենք ներկայացնում այդ հոդվածից մի հատված:
…Հայաստանում շատերին հետաքրքրում է արդյոք Ռուսաստանում դեկտեմբերին տեղի ունեցած իրադարձությունները կազդեն գործընթացների վրա, որ այսօր կատարվում են հայ հասարակության մեջ: Մասնավորապես , սպասվո՞ւմ է արդյոք օտարալեզու` հատկապես ռուսական, դպրոցների բացման հետ կապված խնդրի սրացում, կամ հայկական տնտեսության մեջ ռուսական բրենդների մոնոպոլիզացիայի հանդեպ դժգոհության խորացում: Այս առումով, դեկտեմբերյան իրադարձությունները Հայաստանի համար լուրջ ազդանշան են զգաստ լինելու…
…Ինչ վերաբերում է Հայաստանում ռուսալեզու դպրոցների բացման խնդրին, ապա այստեղ մենք մի այլ երևույթ ենք տեսնում, բայց միևնույն է` կապված Ռուսաստանի ռազմավարական ծրագրի հետ:
Մեր երկրում դպրոցական կրթության մոդեռնիզացիան գլոբալիզացիայի պայմաններում ակտուալ խնդիր է անկախ պետականության պահպանման համար: Այո, նման պնդումը չափազանցում չէ:
Մեր դպրոցի մոդեռնիզացման ուղիներից մեկը` առաջին քայլը այդ ճանապարհին, պետք է լիներ Ռուբեն Վարդանյանի մտահղացման իրագործումը:
Իսկ գաղափարը հետևյալն է. Հայաստանում կրթական համալիր ստեղծել` մոսկովյան «Սկոլկովո» դպրոցի օրինակով: Այդ անելու համար անհրաժեշտ էր «Լեզվի մասին» օրենքում որոշակի փոփոխություններ կատարել: Ահա այստեղ սկսվեց քաղաքականացված շարժում, որի նպատակն է ազգայնական կրքերի բորբոքումը` ուղղված ռուսական կրթության «վտանգների վարկաբեկմանը», որը իբր խարխլում է հայկական պետականության հիմքերը:
Դա նաև էթնիկ ատելություն է բորբոքում, քանի որ նման հակառուսական հիստերիաների կազմակերպիչները հստակ գիտակցում են, որ դա անխուսափելիորեն կազդի հայ միգրանտների հանդեպ ռուսների ունեցած վերաբերմունքի վրա:
Ինչպես տեսնում ենք, նման կրթական կենտրոններ գործում են ոչ միայն Ռուսաստանում, այլև հետխորհրդային տարածքում: Այսօր անհրաժեշտ է հստակ գիտակցել, որ քաղաքական կայունությունը Ռուսաստանում անհրաժեշտ պայման է հայ հասարակության կյանքը դեպի լավը փոխելու համար:
Հայաստանում մենք ոչ մի բարիք չենք ունենա, եթե Աստված չանի, Ռուսաստանում միջէթնիկ բախումներ հրահրվեն: Ահա թե ինչու Հայաստանի գիտակից քաղաքացիները խիստ շահագրգռված են Ռուսաստանի կայունությամբ և բարգավաճմամբ:
