Գ. Մինասյանի 2 գնահատականները

26 Հունվար, 2011 17:34

Դիտումներ՝ *

Այսօր լրագրողների հետ հանդիպման ժամանակ ԱԺ ՀՀԿ խմբակցության պատգամավոր Գագիկ Մինասյանը, պատասխանելով այն հարցին ի պատասխան, թե, ի վերջո, ի՞նչ շահեց Հայաստանը հայ-թուրքական սահմանի բացման ֆուտբոլային դիվանագիտությունից, ասաց, որ գործընթացը դեռ չի ավարտվել և գտնվում է պասսիվ փուլում: «Սակայն այսօր արդեն երկու գնահատական միանշանակորեն կարելի է տալ: Նախ մեզ հաջողվեց այս գործընթացի արդյունքում Ցեղասպանության խնդրի վերաբերյալ բանավեճը տեղափոխել Թուրքիա»,- ասաց Գ. Մինասյանը` հավելելով, որ թուրքական իշխանության բարձր օղակներում և մշակութային գործիչների շրջանում բանավեճ է ծավալվում ոչ միայն Ցեղասպանության, այլև դրա ճանաչման վերաբերյալ։ «Դա մակընթացություններով կամ տեղատվություններով, արագ կամ դանդաղ տարածվելու է թուրքական ողջ հասարակության մեջ»,- համոզված է Գ. Մինասյանը: Մեր երկրորդ ձեռքբերումը այս գործընթացում, ըստ Գ. Մինասյանի, այն է, որ աշխարհը տեսավ, թե որքան կառուցողական է տրամադրված Հայաստանը, երբ որևէ նախապայման չի դնում Թուրքիայի հանդեպ և պատրաստ է բաց քննարկման: Սրանով, ըստ Գ. Մինասյանի, մենք ցույց ենք տալիս աշխարհին, որ մեր ընկալումները կաղապարված չեն՝ ի տարբերություն թուրքերի: «Եթե երկիրը գնում է միջազգային զարգացումների ընդհանուր տրամաբանությանը հակառակ, ապա այդ երկրում առաջանում են ուժեր, որոնք փորձում են երկիրը բերել միջազգային զարգացումների ընդհանուր տրամաբանության հուն։ Շատ երկրներ այս պարագայում ուղղակի տրոհվում են։ Ես չեմ ցանկանում ասել, որ այդ ամենը սպառնում է նաև Թուրքիային, սակայն ընդհանուր տրամաբանությունը հենց դրա մասին է խոսում»,- ասաց Մինասյանը։