«Արմինֆո» գործակալությանը տված հարցազրույցում Եվրոպայի խորհրդի գլխավոր քարտուղար Տուրբյորն Յագլանդը հայտարարել է, որ Լեռնային Ղարաբաղի կարգավորման հարցում անհրաժեշտ է ապահովել օրենքի գերակայությունը և մարդու իրավունքների պաշտպանությունը: Նա ասել է, որ ղարաբաղյան կարգավորման բանակցություններն անցնում են Միսկի խմբի հովանու ներքո, և, ինչպես հայտնի է, Եվրոպայի խորհուրդը չի մասնակցում այդ գործընթացին:
«Մեզ ուղղված համապատասխան խնդրանքներ չեն եղել հակամարտող կողմերի կամ ԵԱՀԿ Մինսկի խմբի համանախագահների կողմից, սակայն կցանկանայի ասել, որ խաղաղ կարգավորման ջանքերում պետք է առաջնային լինի օրենքի գերակայությունը»:
«Դա վերաբերում է ոչ միայն այս հակամարտությանը, այլև Եվրոպայի այլ սառեցված հակամարտություններին: Այդ իսկ պատճառով սրա` որպես հակամարտության կարգավորման կարևորագույն տարրի վրա պետք է դրվի հիմնական շեշտը»,- ասել է Յագլանդը:
Յագլանդը նաև անդրադարձել է հայ-թուրքական կարգավորման գործընթացին. «Ես հույս ունեմ, որ այստեղ առաջընթաց կլինի: Արձանագրությունները սպասում են, և ես հույս ունեմ, որ վավերացման գործընթացը կարող է վերսկսվել ինչքան հնարավոր է շուտ: Ես պետք է խոստովանեմ, որ դրական ազդակներ չեմ տեսնում այս պահին, սակայն դա կարող է փոխվել, և փաստն այն է, որ արձանագրությունները սեղանի վրա են, և պետք է արվի հաջորդ քայլը, որպեսզի անցում լինի հարաբերությունների ավելի լավ մակարդակի»,ա սել է Յագլանդը: