Թուրքիայում այսպես կոչված «Մարմնավաճառների բանդա» գործի շրջանակում իրականացված լայնամասշտաբ գործողության արդյունքում ձերբակալվել է 35 զինվորական։ Ձերբակալվածները հիմնականում մեղադրվում են շանտաժի եւ լրտեսության մեջ:
Թուրքական Anadolu գործակալության փոխանցմամբ, թուրք իրավապահները միաժամանակյա գործողություն են իրականացրել Ստամբուլում, Անկարայում, Անթալիայում, Իզմիրում, Գյոլջյուքում եւ Քարամյուրսելում: Խուզարկություններ են իրականացվել Թուրքիայի զինված ուժերի գլխավոր շտաբի էլեկտրոնային համակարգերի վարչությունում եւ Թուրքիայի գիտական եւ տեխնոլոգիական հետազոտությունների կենտրոնում: Հիշեցնենք, որ վերջերս ինքնասպանություն էր գործել Թուրքիայի ռազմածովային ուժերի կապիտան Դողան Աքընը, որն այն բարձրաստիճան թուրք սպաների թվին էր պատկանում, որոնք անցնում էին վերջերս Թուրքիայում մեծ աղմուկ բարձրացրած «Մահափորձ ծովակալների դեմ» եւ «Մարմնավաճառների բանդա» գործերով:
Այս տարվա օգոստոսի 18-ին Ստամբուլի նահանգապետ Հուսեյին Ավնի Մութլուն եւ Ստամբուլի անվտանգության վարչության պետ Հուսեյին Չափքընը Թուրքիայի վարչապետ Ռեջեփ Թայիփ Էրդողանին հենց օդանավակայանում հանձնել էին այսպես կոչված «Մարմնավաճառների բանդա» գործը: Թուրքիայի ռազմածովային ուժերում ծառայող սպաներն իրենց գործընկերներին շանտաժի ենթարկելու համար հիմնել էին «մարմնավաճառների բանդա»: