ՀԱՊԿ-ի խաղաղարար ուժերի ձևավորումն ավարտված է

Ինչպես այսօր հայտարարել է հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան, կազմակերպության անդամ երկրներն ավարտել են «երկնագույն սաղավարտներ» խաղաղապահ զորամիավորման ձևավորումը, որոնք շուտով ձեռնամուխ կլինեն գործնական քայլերի մշակմանը:
«Խաղաղապահ ուժերի ձևավորման փաստաթղթերի փաթեթն արդեն վավերացված է անդամ բոլոր երկրների կողմից, և որոշված է նրանց որակական ու քանակական կազմը»,- ասել է նա: Այս մասին հաղորդում է РИА-Новости գործակալությունը: Բորդյուժան նաև հայտարարել է, որ իրավական նորմերի ընդունման պահանջը եղել է Ղրղզստանի դեպքերից հետո, երբ ՀԱՊԿ-ը փաստացի չկարողացավ իրականացնել խաղաղապահ առաքելություն, որի անհրաժեշտությունն այդ օրերին կար:
Այս ուժերի կազմում կլինեն 3,5 հազար զինվորական, ինչպես նաև մոտ 500 ներկայացուցիչ անդամ երկրների իրավապահ մարմիններից:
Անցած տարի իրականացվել են խաղաղապահ ուժերում ներկայացված ստորաբաժանումների հրամանատարների հավաքներ, իսկ 2011 թ. նախատեսվում է հատուկ զորավարժությունների անցկացում, որտեղ կմշակվեն ՀԱՊԿ տարածքում և նրանից դուրս խաղաղապահ առաքելություն իրականացնելու հնարավորությունները:
Հիշեցնենք, որ այս կազմակերպության անդամ են Հայաստանը, Բելառուսը, Ղրղզստանը, Ղազախստանը, Տաջիկստանը և Ուզբեկստանը: