ՀՀԿ համամասնական ցուցակի 21-րդ հորիզոնականում առաջադրված Կարինե Աճեմյանը ՀՀ վաստակավոր դերասան Արա Դեղտրիկյանի կինն է: «Առաջին լրատվական»-ի հետ զրույցում դերասանը նշեց, որ իր կինը միշտ էլ եղել է ՀՀԿ-ի ակտիվ գործիչներից և քաղաքական մեծ ճանապարհ է անցել. «Իմ կինը քաղաքական մեծ ճանապարհ է անցել: Այնպես չէ, որ մյուս նորաթուխ պատգավորների նման է: Ես կարծում եմ՝ այդ աշխատանքը գնահատվել է, և նա իր արժանի տեղն է զբաղեցրել Հանրապետական կուսակցության համամասնական ցուցակում»:
«Երբ դեռ մի քանի տարի առաջ կինս որոշեց անդամագրվել ՀՀԿ-ին, մեզ մոտ ոչ մի խնդիր չառաջացավ: Ես ինքս անկուսակցական եմ, քանի որ կարծում եմ՝ դերասանը պետք է ազատ լինի, բայց սատարելու եմ իմ կնոջը»,- ասաց Դեղտրիկյանը:
«Առաջին լրատվական»–ի այն հարցին, թե դժվար չէ արդյոք դերասան լինելով հանդերձ՝ լինել նաև պատգամավորի ամուսին, նա պատասխանեց. «Պատգամավորի ամուսին լինելը դժվար չէ: Իհարկե, լինում են ինչ–ինչ հարցեր, որոնց շուրջ մենք տարբեր տեսակետներ ենք հայտնում, բայց երբեք վեճեր կամ խնդիրներ չեն առաջացել: Մեր աղջիկը ևս այս հարցին նորմալ է վերաբերվում»:
Վերջում Արա Դեղտրիկյանը հավելեց. «Ես կցանկանայի, որ քաղաքականությամբ զբաղվող մարդիկ անցնեն քաղաքական ճանապարհ: Եթե մարդկանց թվում է, որ ԱԺ-ում հայտնվելը միայն կոճակ սեղմելն է՝ շատ են սխալվում»: