Արձակագիր, հրապարակախոս Արամ Պաչյանը, վերլուծաբան, գրականագետ Անուշ Սեդրակյանը և ԳԱԱ գրականության ինստիտուտի փոխտնօրեն, Արցախյան պատերազմի մասնակից Վարդան Դևրիկյանն այսօր լրագրողների հետ հանդիպման ժամանակ խոսեցին բանակի և հատկապես վերջին 6-7 ամիսների ընթացքում բանակի հիմնախնդիրների շուրջ սուր հրապարակումների մասին:
Արամ Պաչյանն ասաց, որ բանակը վարդագույն ներկայացնելը սխալ է, քանի որ բանակում շատ բաներ կան, որ հասարակությունը չգիտի, և ինքն իր հրապարակումների միջոցով ներկայացնելու է այն ամենը, ինչ տեսել ու ինչ զգացել է. «Ես ավելի սուր ձևերով եմ արտացոլելու այն իրականությունը, որ տիրում է բանակում, իհարկե, գեղարվեստական երկի միջոցով, որպեսզի հասնենք ճշմարտությանը»:
Անուշ Սեդրակյանը, շարունակելով այդ միտքը, ասաց, թե ինքն այնպիսի տպավորություն ունի, որ մենք պետք է հասնենք ոչ թե ճշմարտությանը, այլ գոնե գոյապահպանմանը. «Ճշմարտությունը մեզ համար ներկա դրությամբ շքեղություն է, այն ամենը, որ ունենք բանակում, ընդամենը կենսական խնդիրների արտացոլումն է, և դա շատ բնական է, ցավոք, մեր բանակը շատ փակ համակարգ է: Ինքնասպանությունների այս շարանը այն հոգևոր ինքնասպանությունն է, որ ամեն վայրկյան իրականացվում է հասարակության ներսում և, երբ մենք մտնում ենք բանակ, այդ հոգևոր ինքնասպանությունը դառնում է ֆիզիկական: Բանակը այն միկրոսխեման է, որն ավելի խիստ, ավելի այլանդակ կերպով արտացոլում է այն, ինչ մենք ունենք, ինչ կատարվում է հասարակության մեջ»:
«Մենք կանգնած ենք մի կարևոր հարցի առջև. փաստեր և փաստերից ընդհանրացումներ, այսինքն՝ ոչ ոք չի ասում, թե զորամասերում գրանցված որևէ փաստ պետք է կոծկել: Այսօր անընդհատ ցեխի նման մեր հրամանատարական կազմի վրա շպրտում ենք՝ դուք սադիստ եք, դուք մարդ ծեծող եք, և դա մեծ դառնություն է բերում»,- հրամանատարներին պաշտպանելով՝ ասաց Վ. Դևրիկյանը:
Բանախոսի կարծիքով, պետք է ստեղծվի չափանշային հասկացություն, որը չպետք է իրականությունից կտրված լինի. «Պետք է մի իդեալ չափանիշ լինի, որի հետ հարաբերվի այսօրվա հրամանատարի կերպարը: Այսօրվա մեր բանակի գլխավոր խնդիրը ոչ թե զինվոր-հրամանատար փոխհարաբերությունն է, այլ զինվոր-զինվոր փոխհարաբերությունը»:
Բանախոսներն այդպես էլ մի կարծիքի չհանգեցին՝ պե՞տք է արդյոք հրապարակավ ներկայացնել բանակում տեղի ունեցող իրադարձությունները, թե՞ ոչ. յուրաքանչյուրը մնաց իր կարծիքին:
