Ինչպես գրում է ռուսական Московский комсомолец թերթը, Մոսկվայում ամանորյա տոների ժամանակ խոշոր ահաբեկչություն էր նախապատրաստվում, սակայն այն երջանիկ պատահականությամբ ձախողվել է: Թերթը, հղում անելով իրավապահ մարմիններում իր աղբյուրներին, գրում է, որ Մոսկվայի շենքերից մեկում վարձած բնակարանում դեկտեմբերի 31-ի լույս հունվարի 1-ի գիշերը տեղի է ունեցել պայթյուն, քանի որ պայթուցիկ սարքի մաս կազմող հեռախոսի վրա եկել է ամանորյա շնորհավորական կարճ հաղորդագրություն: Իսկ sms-ն ուղարկել է հեռախոսային օպերատորը: Պայթյունի հետևանքով տեղում մահացել է մահապարտ-ահաբեկիչ մի կին, իսկ նրա հանցակիցները փախել են:
Նախատեսված ծրագրով, ահաբեկիչները պատրաստվում էին պայթուցիկը գործի դնել ուշ գիշերով «Մանեժնայա» հրապարակում, երբ այնտեղ հազարավոր մարդիկ հավաքված կլինեին:
Ըստ թերթի՝ հենց մահացածի հանցակիցների խումբն էլ, որը կազմված է եղել երեք կանանցից և մեկ տղամարդուց, իրականացրել է «Դոմոդեդովո» օդանավակայանի պայթյունը 2011 թ. հունվարի 24-ին:
