Ցածր միջին քաշային կարգում հանդես եկող անպարտելի բռցքամարտիկ Վանես Մարտիրոսյանը (32-0-0) հայտարարել է, որ պատրաստ է մենամարտելու առաջին միջին քաշային կարգում փայլուն հեռանկարներ ունեցող կուբացի Էրիսլանդի Լարայի (16-1-1) հետ: Հայազգի բռնցքամարտիկը հայտնել է նաև, որ մտադիր է իր համար երաշխավորելու ցածր միջին քաշային կարգում WBC վարկածով աշխարհի չեմպիոն Սաուլ Ալվարեսի (39-0-1) հետ մենամարտը:
«Երջանիկ եմ, որ կարողացանք որոշ հարցերում առաջընթաց գրանցել: Կարծում եմ` իմ մենամարտն Ալվարեսի դեմ կանցնի ավելի հետաքրքիր, քան նրա հանդիպումը Մոզլիի հետ: Ես ցանկանում եմ պայքարի մեջ մտնել Լարայի հետ, սակայն մենեջերս աշխատում է Ալվարեսի դեմ մենամարտի երաշխիքներ ստանալու ուղղությամբ: Իհարկե, նրա ներկայացուցիչներն ինձ ամենաանտանելի պայմանները կառաջարկեն, բայց ես պատրաստ եմ ընդունելու ցանկացած պայման»,- Մարտիրոսյանին մեջբերում է Boxingscene-ն: